Protesta kundër qeverisë hyn sot në ditën e saj të 57-të, ndërsa qytetarët pritet të mblidhen sërish në...
AKTUALITET
Ngjarja e rëndë në Roskovec/ Publikohet momenti kur RENEA rrethon makinën e Nertil Buzit
PiranjatPërditësimi i fundit 26 Korrik 2026, 21:19
Kanë dalë pamjet nga momenti kur efektivët e RENEA-s, Policia e Shtetit dhe përfaqësues të Prokurorisë rrethojnë automjetin ku ishte izoluar Nertil Buzi, pak çaste përpara se 35-vjeçari t’i jepte fund jetës, pas rreth 10 orësh negociata me autoritetet.
Pas ngjarjes së rëndë të ndodhur më 24 korrik në fshatin Vidhisht të Roskovecit, ku humbën jetën Kosta Plaka dhe më pas në spital edhe bashkëshortja e tij, Belere Plaka, autori u mbyll në automjetin e tij, duke refuzuar t’u dorëzohej forcave të Policisë.
Gjatë orëve të negociatave, efektivët e RENEA-s dhe negociatorët e Policisë tentuan ta bindnin të dorëzohej. Sipas informacioneve, ai refuzoi çdo përpjekje për t’u vetëdorëzuar, por në një moment pranoi të lironte ish-të fejuarën e tij, Rozalinda Plaka, të cilën e mbante me vete pas krimit.
Pamjet e siguruara tregojnë momentet kur forcat speciale dhe hetuesit ndodhen pranë automjetit, megjithatë, 10 orë negociata nuk kanë dhënë rezultat dhe Buzi i dha fund jetës brenda automjetit.
Ndërkohë, Rozalinda Plaka, e vetmja e mbijetuar e tragjedisë, është marrë në pyetje nga grupi hetimor. Në dëshminë e saj paraprake, ajo ka rrëfyer se u zgjua nga zhurmat në banesë dhe pa ish-të fejuarin e armatosur në dhomën e saj, i cili e detyroi ta ndiqte drejt automjetit. Ajo ka deklaruar se në ato momente nuk e kishte kuptuar se çfarë kishte ndodhur me prindërit e saj.
Hetimet vijojnë për të zbardhur plotësisht motivet e krimit dhe të gjitha rrethanat që çuan në ngjarjen tragjike.
