Përfitonin shuma parash nga biznesmenët duke u hequr si zyrtarë vendorë, në pranga dy persona në Lezhë, komunikimi bëhej përmes aplikacionit “Signal”

policia e lezhes

LEZHË- Dy persona janë arrestuar në Lezhë pasi akuzohen për mashtrim. Një 35-vjeçar dhe një 37-vjeçar, të dy banues në Shijak, përmes aplikacionit "Signal", hiqeshin si përfaqësues të institucioneve vendore, dhe përmes mashtrimit kanë përfituar një shumë parash prej 15 mijë eurosh. 

Të arrestuarit janë Shkëlqim Domi 35 vjeç dhe Saimir Sallaku 37 vjeç, të dy banues në Shijak, ndërsa u shpall në kërkim bashkëpunëtori i tyre, Shefik Kurti, 63 vjeç, banues në Tiranë.

NJOFTIMI I POLICISË:

DVP Lezhë/Finalizohet në bashkëpunim me DVP Tiranë, operacioni policor i koduar “Imposter”, për zbardhjen e një skeme mashtrimi për përfitimin e parave nga operatorët ekonomikë.

Mashtronin shtetas të ndryshëm, nëpërmjet një aplikacioni, duke komunikuar me ta, në emër të përfaqësuesve të institucioneve vendore, vihen në pranga 2 shtetas, punohet për kapjen e bashkëpunëtorit të tyre.

Seksioni për Hetimin e Krimeve Ekonomike dhe Financiare, pas kallëzimit nga një shtetas, se i kishin marrë një shumë parash me anë të mashtrimit nëpërmjet një aplikacioni, kanë nisur hetimet me metoda proaktive, në drejtimin e Prokurorisë, për zbardhjen e këtij rasti dhe për identifikimin e shtetasve të përfshirë. Si rezultat i veprimeve hetimore të kryera në kuadër të operacionit policor të koduar “Imposter”, u ndaluan shtetasit:

Sh. D., 35 vjeç dhe S. S., 37 vjeç, të dy banues në Shijak.

Gjithashtu, u shpall në kërkim shtetasi Sh. K., 63 vjeç, banues në Itali.

Nga veprimet hetimore dyshohet se shtetasit Sh. D. dhe S. S., në bashkëpunim me shtetasin Sh. K., më datë 14.07.2024, kanë përfituar 15 000 euro, nga administratori i një operatori ekonomik, duke komunikuar me të në aplikacionin “Signal”, në emër të përfaqësuesve të institucioneve vendore. Më datë 17.07.2024, ata kanë tentuar të përfitojnë një tjetër shumë të madhe parash, nga ky shtetas, me anë të së njëjtës skemë.

Në bashkëpunim me strukturat hetimore të DVP Tiranë, vijojnë hetimet për zbardhjen e një rasti të ndodhur një Tiranë, ku këta shtetas kanë tentuar të përfitojnë 20 000 euro, nga një shtetas, me anë të kësaj skeme mashtrimi.

Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Lezhë, për veprën penale “Mashtrimi” me pasoja të rënda, kryer në bashkëpunim.

policia e lezhes