Një autobus i transportit publik në Tiranë është aksidentuar ditën e sotme në afërsi të gjykatës së Tiran...
AKTUALITET
“Shishet apo shteti?” Rakip Suli i plas propagandën Ramës para syve të publikut
PiranjatPërditësimi i fundit 9 Janar 2026, 11:48
Ndërsa Kryeministri Edi Rama përpiqet t’ia faturojë përmbytjet qytetarëve, duke i justifikuar ato me “shishe plastike” dhe “papërgjegjshmëri individuale”.
"...Sigurisht që kur i hedhim plehrat e shishet plastike nëpër fusha e në anët e rrugëve të atdheut që e duam vetëm në stadium, vjen një ditë shiu me gjyma.."u shpreh Rama
Por një prej kryebashkiakëve të tij, Rakip Suli i Kamzës, ka thënë publikisht atë që të gjithë e dinë, por që qeveria nuk e pranon: problemi nuk janë qytetarët, por infrastruktura.
Në një postim të fundit, Suli deklaron se Kamza nuk ka pasur asnjë përmbytje që nga viti 2020, falë ndërtimit të 406 kilometrave rrjet kanalizimesh dhe investimeve të drejtpërdrejta në infrastrukturën e nëndheshme.
Kjo deklaratë nuk është thjesht propagandë lokale. Ajo rrëzon drejtpërdrejt narrativën e Kryeministrit, sipas së cilës fajin për përmbytjet e kanë qytetarët që “hedhin mbeturina në kanale”.
Nëse shishet plastike janë shkaku i vërtetë, atëherë pse Kamza nuk përmbytet, ndërsa Durrësi, Klosi, Berati, Vlora dhe Gjirokastra u mbytën?Sidomos rasti i Gjirokastrës është tronditës: një qytet i ndërtuar në shpat mali, qindra metra mbi nivelin e detit, u përball me përmbytje që askujt nuk do t’ia kishte marrë mendja.
A ishte vallë faji i “shisheve plastike”? Apo ishte mungesa e sistemeve funksionale të kanalizimeve, pastrimit të kolektorëve dhe investimeve reale në infrastrukturë?
Në mënyrë paradoksale, është vetë një kryebashkiak i Partisë Socialiste që tregon të vërtetën: kur bëhen tubacionet e duhura, kur ndërtohet rrjeti i kanalizimeve dhe menaxhimi i ujërave, përmbytjet nuk ndodhin.
Pra, Rama e di këtë. E di se problemi nuk është qytetari, por shteti. E di se përmbytjet nuk janë “fatkeqësi natyrore”, por pasoja të drejtpërdrejta të mosinvestimit, keqmenaxhimit dhe projekteve të pambaruara.
Pikërisht këtu qëndron hipokrizia: nga njëra anë, kryeministri zhvendos fajin te qytetarët; nga ana tjetër, kryebashkiaku i tij pranon se zgjidhja është infrastruktura. Dy narrativa të kundërta, por një e vetme e vërtetë. Përmbytjet në Durrës, Fier, Klos, Shkodër, Laç, Lezhë, Kukës, Berat, Vlorë e Gjirokastër nuk erdhën nga shishet plastike. Ato erdhën nga mungesa e tubacioneve, nga kanalet e bllokuara, nga projektet e lëna përgjysmë dhe nga një qeverisje që preferon justifikimin në vend të përgjegjësisë. Kur propaganda përplaset me faktet, e vërteta del edhe nga brenda sistemit. Dhe këtë herë, e tha vetë një kryebashkiak i Ramës./Piranjat news
