Në Shqipëri numri i fëmijëve po bie ndjeshëm, ndërsa investimet në arsim dhe mbrojtje sociale mbeten dukshëm më t...
AKTUALITET
SPAK mbyll dyert për gazetarët dhe publikun në gjykimin e dosjes së hakerimit të 3 e-maileve të prokurorëve
PiranjatPërditësimi i fundit 12 Maj 2026, 16:14
Janë mbyllur dyert e transparencës në procesin penal ndaj 3 të pandehurve, Agim Ismaili, Arnold Rrokaj dhe Zambak Gjoni, të cilët SPAK i akuzon për hakërimin e 3 e-maileve të prokurorëve Behar Dibra, Elida Kaçkini dhe Enkeleda Millonai.
Kërkesa është bërë në një kohë kur çështja penale ka kaluar për shqyrtim të zakonshëm gjyqësor, por prokurori i çështjes nuk ka pranuar që në seancën gjyqësore të jenë të pranishëm gazetarët dhe familjarë të të pandehurve.
Shkak i kësaj kërkese, sipas Maksutit lidhet me sekretet e vetë Prokurorisë së Posaçme SPAK që u hakerua nga Arnold Rrokaj.
Pikërisht në 3 e-mailet e prokurorëve Behar Dibra, Elida Kaçkini dhe Enkeleda Millonai, Rrokaj, ka mundur të shkarkojë dokumente hetimore dhe më pas t’ia shpërndajë Zambak Gjonit dhe mandej ky i fundit t’ia kalojë Agim Ismailit dhe personave të tjerë.
Prokuroria e posaçme i ndruhet rrjedhjes së dokumenteve sekrete që ka mundur të hakerojë i pandehuri Rrokaj dhe për pasojë nuk do të zbulojë veprimet dinamike që janë kryer për këtë hetim penal ndaj 3 të pandehurve.
Ndaj Maksuti, i kërkoi gjykatës mbylljen e dyerve duke mos lejuar që për këtë çështje të bëhet transparencë por gjithçka të mbetet hermetike.
Kërkesa e prokurorit të SPAK është kundërshtuar nga të pandehurit dhe avokatët e tyre, të cilët i kanë kërkuar gjykatës të mos pranonte dhe rrëzonte kërkesën e prokurorit të çështjes.
Por në fund të diskutimit në seancë për këtë pikë, gjyqtarja e çështjes vendosi të pranojë kërkesën e prokurorit Maksuti duke mbyllur derën e gjyqit për gazetarët dhe publikun që ka interes të ndjekë këtë proces gjyqësor.
Ndërkohë seanca e sotme që ishte planifikuar të zhvillohej ndaj 3 të pandehurve, është shtyrë për mungesë të njërës prej gjyqtareve.
Dy nga tre të pandehurit, Arnold Rrokaj dhe Zambak Gjoni, vijojnë të mbahen në burg, ndërsa i pandehuri tjetër Agim Ismaili, po hetohet dhe gjykohet në gjendje të lirë.
Ndaj tyre SPAK ka ngritur akuza të rënda si: “Hyrja e paautorizuar kompjuterike”, paragrafi i dytë dhe “Përgjimi i paligjshëm i të dhënave kompjuterike”, paragrafi i dytë, të kryer në formën e posaçme të bashkëpunimit atë grupit të strukturuar kriminal, “Grupi i strukturuar kriminal”, “Kryerja e veprave penale nga organizata kriminale dhe grupi i strukturuar kriminal”.
Gjatë marjes në pyetje Arnold Rrokaj, e ka pranuar se ishte ai që kishte mundur të hynte në 3 e-mailet e prokurorëve të SPAK, duke përdorur vetëm një kod rutinë që ishte “Spak@2019”.
Ndërsa vetë dy të pandehurit e tjerë, nuk kanë pranuar të kenë hyrë apo të kenë pasur akses në sistemin e postave elektronike të asnjërit prej prokurorëve të SPAK.
Pavarësisht pretendimeve të SPAK, do jetë gjykata e Posaçme që pas përfundimit të shqyrtimit gjyqësor do vendosi nëse 3 të pandehurit do shpallen fajtorë apo të pafajshëm. /Syri/
