Situata e zjarreve në Shqipëri vijon të kërkojë ndërhyrje në disa zona të vendit.
Sipas Ministrisë së Mbroj...
AKTUALITET
Strategjitë që do kontribuojnë në anëtarësimin e Shqipërisë në BE, kostoja llogaritet 7.6 miliardë euro
PiranjatPërditësimi i fundit 20 Shkurt 2025, 13:57
Foto ilustruese
TIRANË - Rreth 7,6 miliardë euro llogaritet totali i kostos për financimin e zbatimit të strategjive deri në 2028 që do të kontribuojnë në anëtarësimin e Shqipërisë në Bashkimin Europian (BE).
Të dhënat për totalin e kostos për zbatimin e strategjive të periudhës 2026-2028 janë publikuar në Fletoren Zyrtare te vendimi “Për miratimin e dokumentit të politikave prioritare 2026–2028”.
“Totali i fondeve të nevojshme për të financuar aktivitetet/masat specifike të strategjive të mësipërme të cilat do të kontribuojnë drejtpërdrejtë në realizimin e objektivave specifikë dhe atyre strategjikë kap vlerën e afro 750 miliardë lekëve ose rreth 7,63 mld euro (përditësuar vlera për 2026–2028)”, thuhet në vendim.
Dokumenti i Politikave Prioritare 2026-2028 është dokumenti që përcakton drejtimet kryesore të politikës së përgjithshme shtetërore dhe është një nga elementet më të rëndësishme të planifikimit të integruar strategjik.
Në vendim përcaktohet se përmes këtij dokumenti, procesi i hartimit të buxhetit afatmesëm dhe i alokimit të burimeve financiare orientohet drejt përmbushjes së prioriteteve të përcaktuara.
Ndërsa disbursimi i mbështetjes së Bashkimit Europian, sipas “Vendimit zbatues të Komisionit Europian për miratimin e Agjendave të Reformës dhe programit shumëvjeçar të punës në kuadër të Facilitetit të Reformave dhe Rritjes për Ballkanin Perëndimor” (për 5 vende nga Ballkani Perëndimor), do të kushtëzohet nga progresi i matshëm në zbatimin e reformave të parashikuar në agjendë.
Vendimi u miratua nga Komisioni Europian më 23 shtator 2024.
Sipas vendimit të KE-së, kushtet e pagesës do të përcaktohen në bazë të plotësimit të hapave cilësorë dhe sasiorë, sipas afateve kohore të përcaktuara për secilin vend dhe për secilën reformë.
Stabiliteti makrofinanciar, menaxhimi i shëndoshë i financave publike, transparenca dhe mbikëqyrja e buxhetit janë kushte të përgjithshme që duhet të përmbushen për pagesat dhe lirimin e fondeve.
Vlera e përgjithshme që pritet të përfitojë, në parim, vendi ynë, për periudhën 2024–2027 është 922,085,888 euro (grant dhe kredi), pagesa të kushtëzuara me zbatimin e reformave kyçe siç janë përcaktuar në Agjendën Kombëtare të Reformave të secilit vend.
Alokimet parashikojnë të mbështesin sektor, si: klima e biznesit, kapitali njerëzor, aftësitë dixhitale, energjia dhe tranzicioni i gjelbër dhe shteti i së drejtës./ Monitor
