DashiSot fuqitë tuaja bindëse janë në nivelin më të lartë. Kjo është një ditë e mirë për t&eu...
AKTUALITET
U arrestua në Itali për vrasjen e Klevis Lleshit, kush është Sajmir Kolaveri ndërmjetësues atentatesh dhe pengmarrja me Ervis Martinin
PiranjatPërditësimi i fundit 27 Shtator 2025, 13:21
Një nga autorët e përfshirë në vrasjen e Klevis Lleshit në Burrel rreth gjashtë vite më parë u arrestua në Itali me kërkesë të SPAK. Sajmir Kolaveri aktualisht ndodhet i arrestuar në një burg në Itali si pjesë e grupit kriminal të Aurel Hoxhës, pronar i disa bizneseve në Tiranë.
Nga hetimet e SPAK, Kolaveri ka pasur rolin e ndihmësit dhe ndërmjetësit për të organizuar rrëmbimin, vrasjen dhe më pas groposjen e 22-vjeçarit Lleshi në fshatin Shpërdhet të Mamurrasit.
SPAK e akuzon për “vrasje për gjakmarrje”, “mbajtja pa leje dhe prodhimi i armëve, armëve shpërthyese dhe municionit”, “fshehja ose asgjësimi i kufomës”, vepra të kryera në kuadër të grupit të strukturuar kriminal. Pritet që të nisin procedurat për ekstradimin e tij nga Italia në vendin tonë, por emri i Kolaverit nuk është aspak i panjohur për autoritetet tona.
Sajmir Kolaveri porositës atentatesh
43-vjeçari Sajmir Kolaveri del i përfshirë në disa ngjarje kriminale. Emri i tij lakohet për një atentat në vitin 2018 në Bathore. Në banesën e Gazmir Dacit u vendos një tritol, ndërsa porositës sipas bluve, ishte vetë Sajmir Kolaveri. Ky i fundit dyshohet ta ketë porositur atentatin për hakmarrje për vrasjen e djalit të tij, Valmir Kolaverit më 4 nëntor 2015, si edhe plagosjen e vëllait të tij Robert Kolaveri nga Gazmir Daci. Në kohën kur u vendos tritoli në banesën e Dacit, ky i fundit po vuante dënimin në burg. Për ngjarjen në atë kohë, Policia arrestoi një 23-vjeçar, Vilson Brahja, i cili akuzohej se vendosi eksplozivin në këmbim të 5 mijë eurove.
Atentati me tritol u porosit për hakmarrje, pasi edhe emri i Sajmir Kolaverit lidhjet me një histori gjakmarrje mes fisit të tij dhe fisit Daci. Zanafilla e përplasjes mes Kolaverëve dhe Gazmir Dacit kishte nisur në Francë ku vëllezërit Kolaveri ishin përfshirë në një konflikt me Gazmir Dacin. 3 vëllezërit merreshin me transport ilegal emigrantësh. Në Francë ata kanë rrahur në bodrum Gazmir Dacin, i njohur si Elson, pasi e akuzonin po u prishte pazaret e transportimit të klandestinëve dhe po u merrte klientët.
Më pas, hakmarrja ka nisur në Shqipëri, ku Daci është përballur në një lokal me Valmir Kolaverin dhe xhaxhanë e tij Robert Kolaveri. Daci ka qëlluar në drejtim të tyre duke i marrë jetën Valmirit dhe Roberti për shkak të plumbave që mori mbeti i paralizuar. Pas vrasjes së Valmir Kolaverit më 4 nëntor 2015, vëllai i Sajmir Kolaverit, Ergysi, së bashku me kushëririn e tij kanë tentuar që të eliminojnë Gazmir Dacin. Ndërsa, vetë Kolaveri më pas ka porositur vendosjen e tritolit në banesën e tij. Po ashtu, edhe lokali i babait të Gazmir Dacit u sulmua me tritol.
Pengmarrje bashkë me ‘ushtarin’ e Ervis Martinajt
Një tjetër ngjarje kriminale ku lakohet emri i Sajmir Kolaverit është një pengmarrje në Tiranë. 7 persona, mes tyre ushtari i Ervis Martinajt, Hektor Xheuçka, ish-presidentin e Klubit të Kamëz, Naim Qarri, si edhe Sajmir Kolaveri morën peng për një orë dhe dhunuan një të ri. Ngjarja ka ndodhur në korrik të 2024-ës, ku grupi mori peng 35-vjeçarin Ervis Xhixha dhe e kanë kanosur atë për t’i marrë 70 mijë euro.
Masa nuk u ekzekutua për Hektor Xheuçkën, i cili është në kërkim edhe nga SPAK për dosjen Revanshi dhe dyshohet se fshihet në Dubai. Për Sajmir Kolaverin u vendos masa arrest në shtëpi me vendim të Gjykatës së Tiranës, por tashmë ai u kap në Itali si i përfshirë në vrasjen e Klevis Lleshit në 2020 për gjakmarrjen mes fisit Hoxha e Lleshi.
