Gjykata e Fierit ka ndryshuar masat e sigurisë për tre vajzat e përfshira në ngjarjen e dhunimit të një 17-vjeçareje, ras...
BOTA
Izraeli paralajmëron SHBA-në: Irani po përgatit komplot të ri për të vrarë Trump
PiranjatPërditësimi i fundit 10 Korrik 2026, 09:28
Izraeli i ka përcjellë inteligjencës amerikane informacione sipas të cilave Irani po përgatit një komplot të ri për të vrarë presidentin amerikan Donald Trump, raportuan të enjten Wall Street Journal dhe CNN, duke cituar burime anonime të njohura me çështjen.
Sipas raportimeve, paralajmërimi ka mbërritur tek autoritetet amerikane gjatë kësaj jave. Një burim i CNN-së tha se bëhet fjalë për një plan të ri iranian, i cili ishte identifikuar pjesërisht edhe nga shërbimet amerikane të inteligjencës.
E pyetur nga Agjencia Franceze e Lajmeve AFP, Shtëpia e Bardhë nuk i mohoi raportimet, por iu referua deklaratës së Donald Trumpit, i cili një ditë më parë tha se ata duan të eliminojnë udhëheqësin amerikan.
"Ata duan të eliminojnë udhëheqësin amerikan mua. Unë jam në një lloj liste. Pashë këtë mëngjes se jam në të gjitha listat e tyre," tha Trump nga Ankaraja gjatë Samitit të NATO-s.
Sipas New York Times, Trump u largua nga samiti i NATO-s me avionin e vjetër presidencial dhe jo me atë të ri të ofruar nga Katari, për shkak të sigurisë. Raportimet vijnë në një periudhë tensionesh mes Uashingtonit dhe Tel Avivit, si edhe mes vetë Trumpit dhe kryeministrit izraelit Benjamin Netanyahu, për shkak të zhvillimeve të fundit në konfliktin me Iranin.
Shtetet e Bashkuara janë aleati kryesor i Izraelit, por presidenti amerikan e ka kritikuar vazhdimisht Netanyahun në javët e fundit, pasi lufta e Izraelit kundër Hezbollahut në Liban ka kërcënuar bisedimet me Iranin.
Burime amerikane, të cituara nga CNN, besojnë se ky transferim i informacionit izraelit te amerikanët mund të jetë një përpjekje nga qeveria e Netanyahut për të bindur Donald Trumpin të vazhdojë bombardimet e tij kundër Iranit, të cilat rifilluan këtë javë.
Shtetet e Bashkuara vranë gjeneralin e fuqishëm iranian Qassem Soleimani në Irak në vitin 2020, gjatë mandatit të parë të republikanit, dhe Irani ka kërcënuar publikisht me hakmarrje, kryesisht kundër Donald Trumpit.
Së fundmi, Irani varrosi udhëheqësin e tij të ndjerë suprem Ali Khamenei, i cili u vra në fund të shkurtit nga një sulm amerikano-izraelit në fillim të luftës së tyre, pas funeralit të tij që zgjati disa ditë dhe u shënua nga një dëshirë për hakmarrje.
