Pas refuzimit të përsëritur të studentëve dhe pedagogëve për t’u ulur në dialog me të, kryeministri Edi Ram...
BOTA
Kalifornia, përpjekje kundër përmbajtjeve të rreme në reklamat politike
n.fPërditësimi i fundit 3 Nëntor 2024, 20:38
Foto ilustruese
KALIFORNI- Shteti i Kalifornisë ka miratuar disa ligje, që vendosin rregulla mbi përdorimin e inteligjencës artificiale. Njëri prej ligjeve trajton edhe përdorimin e inteligjencës artificiale për të krijuar përmbajtje me audio ose video të rreme, të cilat u ngjajnë atyre reale. Siç njofton korrespondentja e Zërit të Amerikës Genia Dulot nga Kalifornia, në këtë periudhë zgjedhjesh në Shtetet e Bashkuara, qëllimi i ligjit është luftimi i dezinformimit, por kjo ka ngritur shqetësime mbi ndikimin që ai mund të ketë mbi lirinë e fjalës.
Rijul Gupta është themelues i kompanisë “Deep Media” me seli në Kaliforni. Kompania po zhvillon teknologji për të zbuluar përmbajtjet e krijuara me inteligjencën artificiale. Ai thotë se ky është një proces sfidues, sepse dallimi mes imazheve të rreme dhe atyre të vërteta është tepër i vogël.
“Ne mendojmë se ky është vetëm fillimi. Me lehtësimin e qasjes në programet e inteligjencës artificiale për qytetarë të thjeshtë, pra jo vetëm me financim nga aktorë shtetëror, ne do të shohim një fluks të madh dezinformatash të krijuara me inteligjencë artificiale”, thotë ai.
Në kuadër të përpjekjeve për të luftuar këtë lloj dezinformimi, Kalifornia ka miratuar një sërë ligjesh, duke përfshirë një ligj që kërkon nga platformat e mediave sociale etiketimin e videove të krijuara me inteligjencë artificiale.
Anëtari i Asamblesë së Shtetit të Kalifornisë, Marc Berman, i cili paraqiti këtë ligj, thotë se i kupton shqetësimet se si ai mund të ndikojë në të drejtat e lirisë së shprehjes, të garantuara nga Kushtetuta amerikane.
"Amendamenti i Parë ju jep të drejtën të thoni atë që dëshironi. Ai nuk të jep të drejtën për t’i vendosur fjalët e tua në gojën e dikujt tjetër. Këtë po bën inteligjenca artificiale dhe kjo është shumë e ndryshme nga mënyra se si e kemi interpretuar Amandamentin e Parë për një kohë shumë të gjatë”, thotë ai.
Ligji përjashton përmbajtjet satirike. Kjo nuk mjafton për aktivistin e mbrojtjes së lirisë së shprehjes, David Snyder.
“Platformat kanë të drejtën e tyre të mbrojtur nga Amendamentit i Parë për të marrë vendime editoriale për atë që duan të publikojnë dhe rregullat e përdorimit të tyre nga të tjerët”, thotë ai.
Eugene Volokh është ekspert i Amendamentit të Parë të Kushtetutës amerikane në Institutin Hoover të Universitetit të Stanfordit. Ai mendon se videot e rreme mund të mashtrojnë votuesit, por vë në dyshim ligjin që kërkon që platformat e mediave sociale të kontrollojnë veten e tyre.
“Kjo e vendos barrën mbi platformat dhe kjo mund të shihet si kufizim i tepërt i lirisë së shprehjes, sepse platformat, të përballura me rrezikun për t'u ndëshkuar për fjalimin e dikujt tjetër, mund të vendosin të mos rrezikojnë dhe të heqin përmbajtjet”, thotë ai.
Ligjet e reja hyjnë në fuqi vitin e ardhshëm. Eksperti Eugene Volokh thotë se ato mund të përfundojnë në gjykatat federale, sepse ligjet federale i mbrojnë platformat në internet nga përgjegjësia për përmbajtjet e krijuara nga përdoruesit e tyre./ VOA
