Situata e zjarreve në Shqipëri vijon të kërkojë ndërhyrje në disa zona të vendit.
Sipas Ministrisë së Mbroj...
BOTA
Mbahen zgjedhjet lokale, Maqedonia e Veriut voton sot
PiranjatPërditësimi i fundit 19 Tetor 2025, 07:10
Sot, Maqedonia e Veriut zhvillon zgjedhjet lokale në 80 komuna, përfshirë kryeqytetin, Shkupin, ku qytetarët do të zgjedhin kryetarët e komunave dhe anëtarët e këshillave komunalë. Ky proces zgjedhor vjen rreth një vit e gjysmë pas zgjedhjeve parlamentare dhe presidenciale të vitit 2024.
Të shtunën, një kategori e veçantë qytetarësh, si të sëmurët, ata në arrest shtëpiak, të burgosurit dhe personat që ndodhen në azilet e të moshuarve, kanë mundur të votojnë.
Në rast se një kandidat nuk arrin të sigurojë mbi 50% të votave, do të zhvillohet balotazhi më 2 nëntor, që do të përcaktojë fituesin.
Në zgjedhjet e këtij viti, kanë të drejtë vote rreth 1.8 milion qytetarë, ndërsa 112 mijë janë të regjistruar në listën speciale për ata që jetojnë jashtë shtetit.
Ky është edicioni i tetë i zgjedhjeve lokale që nga shpallja e pavarësisë së Maqedonisë së Veriut. Për këto zgjedhje, janë regjistruar 309 kandidatë për kryetarë komune dhe 576 lista për këshilltarë, duke përfshirë pjesëmarrjen e 22 partive politike, 19 koalicioneve dhe 119 iniciativave qytetare dhe kandidaturave të pavarura.
Në sondazhet e realizuara gjatë javëve të fundit, ka pasur një ndarje të qartë mes komunave me shumicë maqedonase dhe atyre me shumicë shqiptare. Në komunat maqedonase, rezultati pritet të jetë më i parashikueshëm, ndërsa në ato shqiptare gara është shumë më e fortë dhe e paparashikueshme.
Partia VMRO-DPMNE ka një avantazh të dukshëm në sondazhe, duke kryesuar me 26.7%, e ndjekur nga Lidhja Socialdemokrate e Maqedonisë (LSDM) me 11.1%. BDI dhe Aleanca Kombëtare për Integrim (AKI) renditen së bashku si forcat e treta me 9.9%, ndërsa Koalicioni VLEN është në fund të listës me 7.5%.
Lidhja Socialdemokrate, pas humbjes së thellë në zgjedhjet parlamentare të vitit 2024, po përpiqet të rikuperojë pozitat dhe të ruajë ndikimin e saj në disa komuna, megjithatë, situata mbetet e pasigurt.
Në rreth 15 komuna me shumicë shqiptare, gara do të jetë veçanërisht e ashpër mes BDI-së dhe koalicionit opozitar AKI, si dhe koalicionit VLEN, i cili aktualisht është partner i qeverisë në koalicion me VMRO-DPMNE-në.
