Kryeministri në detyrë i Kosovës, Albin Kurti, ka reaguar ndaj ceremonisë me nderime shtetërore të organizuar në Serbi p&eu...
BOTA
Mister në Dubai: Zhduket ish-bashkëshortja e nipit të sundimtarit
PiranjatPërditësimi i fundit 5 Qershor 2026, 10:47
Një avokat britanik për të drejtat e njeriut thotë se ish-bashkëshortja e nipit të sundimtarit të Dubait është zhdukur pa lënë gjurmë.
Kontakti me Zeynab Javadli humbi të martën dhe BBC ka mësuar se shtëpia e saj në Dubai është gjetur e mbyllur dhe bosh.
Javadli kishte shprehur vazhdimisht shqetësime për sigurinë e saj. Prej vitesh ajo ishte përfshirë në një betejë të ashpër për kujdestarinë e fëmijëve me ish-bashkëshortin e saj, Sheikh Saeed bin Maktoum bin Rashid Al Maktoum.
Miqtë e saj ngritën alarmin pasi telefonatat dhe mesazhet e tyre mbetën pa përgjigje. Avokati dhe aktivisti britanik David Haigh tha se kishte folur për herë të fundit me Javadlin të martën në mbrëmje dhe se që nga ai moment ajo “është zhdukur”.
As ajo dhe as tre vajzat e saj të mitura nuk janë parë apo dëgjuar që prej atëherë.
Sipas Haigh, asnjë autoritet nuk ka dhënë deri tani një shpjegim për atë që mund të ketë ndodhur. Nëna e Javadlit, e cila sapo kishte mbërritur në Dubai për vizitë, shkoi në banesën e saj dhe e gjeti atë bosh, ndërsa bravat ishin ndërruar. Ajo thuhet se ka kontaktuar policinë e Dubait dhe konsullatën e Azerbaijan, vendit nga ku vjen Javadli.
Për muaj të tërë, Javadli kishte qëndruar pothuajse e izoluar në shtëpi, pasi besonte se forcat e sigurisë po prisnin t’i merrnin fëmijët dhe ndoshta ta arrestonin. Vitin e kaluar, ish-bashkëshorti i saj paraqiti një kallëzim në polici duke e akuzuar për rrëmbimin e vajzave të tyre, në episodin e fundit të konfliktit të gjatë për kujdestarinë. Të dy palët kanë akuzuar njëra-tjetrën për rrëmbim të fëmijëve.
Javadli, ish-gjimnaste ndërkombëtare, përballej gjithashtu me mundësinë e arrestimit për shkelje të ligjeve mbi aktivitetet online në Emiratet e Bashkuara Arabe, pasi kishte transmetuar drejtpërdrejt në internet një nga përballjet me ish-bashkëshortin. Në një mesazh video të mëparshëm drejtuar David Haigh, ajo kishte deklaruar:
“E dija se ishte mundësia ime e fundit për të qenë me fëmijët e mi, sepse nuk do të më lejonin t’i shihja më. Besoja sinqerisht se ishte shansi im i fundit, prandaj hapa transmetimin live dhe kërkova ndihmë.”
Avokatët e ish-bashkëshortit kanë pretenduar në gjykatë se Javadli nuk ishte një nënë e përshtatshme, duke e akuzuar se nuk i kishte dërguar vajzat në shkollë, kishte jetuar në kushte të papërshtatshme dhe kishte rrezikuar shëndetin e vajzës më të vogël. Javadli i ka mohuar këto akuza dhe ekipi i saj ligjor ka paraqitur prova në mbështetje të saj.
David Haigh tha se situata aktuale ka “ngjashmëri shqetësuese” me rastin e Princess Latifa, vajzës së sundimtarit të Dubait, e cila në vitin 2018 tentoi të largohej nga vendi për të fituar lirinë.
Anija me të cilën ajo po arratisej u ndalua në Oqeanin Indian dhe princesha u kthye me forcë në Dubai. Më pas, ajo publikoi video ku pretendonte se mbahej e izoluar. Në vitet e fundit ajo është shfaqur sërish në publik, duke deklaruar se është mirë.
Haigh ka bërë thirrje urgjente që komuniteti ndërkombëtar të kërkojë konfirmim për vendndodhjen dhe gjendjen e Zeynab Javadlit./Përktheu Piranjat News
