Një 25-vjeçar nga Rubiku i Mirditës është kthyer në një nga figurat më të spikatura dhe më të shp&eum...
BOTA
Një gjë që nuk e dinit: Ky gabim gjatë pjekjes së peshkut mund t’i zhdukë vlerat ushqyese
PiranjatPërditësimi i fundit 12 Maj 2026, 11:47
Një lloj peshku mund të mos jetë zgjedhja ideale për skarë — edhe pse është shumë i preferuar. Saeng Douangdara, një kuzhinier lao-amerikan dhe krijues përmbajtjesh kulinare, deklaroi së fundmi për The Takeout se filetot e peshkut është më mirë të mos vendosen direkt mbi skarë.
Filetot janë copa peshku pa hala, zakonisht të prera për së gjati. Ato janë zgjedhje e zakonshme për amvisat dhe kuzhinierët që duan të shmangin pastrimin e halave ose përgatitjen e një peshku të tërë.
Kuzhinieri i përshkroi filetot si “mjaft delikate dhe me shumë gjasa do të shpërbëhen gjatë procesit” të pjekjes në skarë, raportoi The Takeout. Kur piqet një peshk i plotë, Douangdara tha se fillimisht e than me letër kuzhine dhe e pastron nga brendësitë. Më pas, ai rekomandon që peshku të mbulohet “bujarish” me kripë të trashë dhe, sipas stilit tradicional lao, goja e peshkut të mbushet me gjethe limoni makrut dhe bar limoni.
Ai thekson se ngrohja paraprake e skarës është faktori kryesor për të parandaluar ngjitjen e peshkut. “Për këdo që është i ri në pjekjen e peshkut në skarë dhe nuk dëshiron të rrezikojë të mbetet pa darkë sepse peshku u shpërbë gjatë procesit, provoni koshat specialë për skarë që mund të kthehen dhe hiqen lehtësisht,” sugjeroi ai.
Nëse filetja në skarë mbetet zgjedhja e preferuar, Douangdara tha se ajo mund të funksionojë — për sa kohë filetoja është e trashë dhe skara shumë e nxehtë.
“Në rastet kur filetoja është e trashë, mund ta piqni në skarë nëse skara është shumë e nxehtë dhe e lyer me vaj, duke vendosur fillimisht anën me lëkurë poshtë,” shtoi ai.
Fox News Digital kontaktoi Douangdara për komente të mëtejshme. “Metoda e gatimit ndikon te vlerat ushqyese dhe kjo duhet theksuar,” tha Whitney Stuart, dietologe dhe edukatore për diabetin me bazë në Teksas, nga Whitness Nutrition.
Sipas saj, pjekja e peshkut në temperatura të larta mund të ulë disa nga përfitimet ushqyese. “Pjekja në skarë me temperaturë të lartë mund të shkaktojë degradimin e omega-3 dhe djegie që prodhojnë amina heterociklike (HCA),” tha Stuart për Fox News Digital.
Kur filetoja shpërbëhet dhe bie mes hapësirave të skarës, kjo mund të shkaktojë “humbje të konsiderueshme të proteinave dhe lagështisë,” shtoi ajo. Sipas Stuart, rëndësi ka edhe lloji i peshkut. Salmoni i egër, sardelja dhe skumbria përmbajnë nivelet më të larta të omega-3 me efekt anti-inflamator. Ajo rekomandon gatimin me letër alumini, kosh për skarë ose dërrasë kedri për të ruajtur “si strukturën e filetos, ashtu edhe profilin ushqyes”. “Temperatura më e ulët dhe gatimi më i ngadaltë janë zgjidhja më e mirë,” këshilloi ajo.
“Sipas teknikës, zierja e lehtë dhe avullimi janë metodat më të buta për ruajtjen e omega-3, por edhe pjekja në skarë e realizuar siç duhet, me një mbrojtje ndërmjetëse, mbetet më e shëndetshme sesa skuqja në vaj të thellë, e cila shton yndyrna të oksiduara dhe ndryshon ndjeshëm profilin ushqyes të ushqimit.”/Përktheu Piranjat News
