Shqipëria do të ndikohet sot nga kushte atmosferike kryesisht të qëndrueshme, me kthjellime dhe vranësira në pjesën më...
BOTA
Përshkallëzohen tensionet mes Turqisë dhe Izraelit, Erdogan: Veprimet e Tel Avivit kërcënojnë sigurinë tonë
PiranjatPërditësimi i fundit 13 Qershor 2026, 09:45
Retorika mes Turqisë dhe Izraelit është ashpërsuar ndjeshëm ditët e fundit, me presidentin turk Recep Tayyip Erdogan që akuzon Izraelin se operacionet e tij në Siri dhe Liban përbëjnë një kërcënim të drejtpërdrejtë për sigurinë kombëtare të Turqisë.
Gjatë një fjalimi në Parlamentin turk, Erdogan deklaroi se veprimet ushtarake të Izraelit në rajon, si edhe lëvizjet e tij në Mesdheun Lindor, ndikojnë drejtpërdrejt në interesat strategjike të Ankarasë. Ai paralajmëroi se Turqia do të reagojë “qartë dhe fuqishëm” nëse cenohen të drejtat e turqve dhe qipriotëve turq.
Deklaratat e tij u pasuan nga një reagim i ashpër i kryeministrit izraelit Benjamin Netanyahu, i cili e cilësoi Erdoganin si një “diktator antisemit” dhe tha se ai nuk mund t’i japë mësime morale Izraelit.
Në mes të shkëmbimit të akuzave u pozicionua edhe presidenti amerikan Donald Trump, i cili minimizoi mundësinë e një përballjeje mes dy vendeve. Duke folur në Shtëpinë e Bardhë, Trump e quajti Erdoganin “një mik shumë të mirë” dhe u shpreh se nuk pret që të ketë një konflikt mes Turqisë dhe Izraelit.
Analistët vlerësojnë se një nga pikat kryesore të përplasjes mbetet Siria, ku Turqia synon të ruajë ndikimin e saj në zhvillimet politike pas ndryshimeve të fundit në vend. Gjithashtu, Mesdheu Lindor shihet si një tjetër zonë e ndjeshme rivaliteti, sidomos pas forcimit të bashkëpunimit mes Izraelit, Greqisë dhe Qipros në fushën politike dhe të mbrojtjes.
Megjithëse ekspertët nuk parashikojnë një konflikt të drejtpërdrejtë ushtarak mes Ankarasë dhe Tel Avivit, ata paralajmërojnë se tensionet diplomatike dhe konkurrenca strategjike në rajon po rriten vazhdimisht, duke e bërë situatën gjithnjë e më të ndërlikuar.
