Kreu i Partisë Demokratike, Sali Berisha, në një dalje për mediat pas mbledhjes së grupit parlamentar demokrat, ka sulmuar qeverin&eu...
BOTA
Samiti për Palestinën, SHBA dhe Izraeli e bojkotojnë
PiranjatPërditësimi i fundit 22 Shtator 2025, 09:55
Një samit ndërkombëtar i nivelit të lartë për zgjidhjen me dy shtete mes Izraelit dhe Palestinës po zhvillohet sot në Nju Jork (22 shtator), nën kryesinë e Francës dhe Arabisë Saudite. Në takim marrin pjesë dhjetëra vende, shumë prej të cilave pritet të shpallin njohjen zyrtare të shtetit palestinez.
Samiti vjen në një kohë tensioni ekstrem në Lindjen e Mesme, teksa Izraeli ka nisur një ofensivë tokësore në Gaza dhe dhuna e kolonëve është shtuar në Bregun Perëndimor. Përballë kësaj, SHBA dhe Izraeli e kanë kundërshtuar nismën, duke e bojkotuar. Ambasadori izraelit në OKB, Danny Danon, e quajti takimin “një cirk politik” dhe paralajmëroi masa kundër Francës.
Nga ana tjetër, administrata amerikane ka paralajmëruar pasoja për vendet që njohin Palestinën, duke përfshirë edhe Francën, presidenti i së cilës, Emmanuel Macron, e po e pret takimin në Nju Jork.
Samiti zhvillohet vetëm pak ditë para Asamblesë së Përgjithshme të OKB-së, ku çështja palestineze pritet të dominojë diskutimet. Në fillim të shtatorit, Asambleja miratoi një deklaratë me shtatë pika për hapa të qartë drejt zgjidhjes me dy shtete, por SHBA dhe Izraeli e kanë cilësuar si një manovër të dëmshme.
Ministri i Jashtëm francez, Jean-Noel Barrot, tha për mediat:
“Deklarata e Nju Jorkut nuk është një premtim i vagullt për të ardhmen, por një plan konkret me prioritete: armëpushim, lirimi i pengjeve dhe hyrje e ndihmave humanitare në Gaza.”
Franca pritet të shpallë sot njohjen e shtetit palestinez, bashkë me disa vende të tjera. Një ditë më parë, këtë hap e ndërmorën Britania, Kanadaja, Australia dhe Portugalia.
Izraeli ka reaguar ashpër ndaj këtyre zhvillimeve. Kryeministri Benjamin Netanyahu përsëriti se “nuk do të ketë shtet palestinez” dhe paralajmëroi zgjerim të vendbanimeve hebraike. Ministrat e linjës së ashpër në qeverinë e tij, Itamar Ben-Gvir dhe Bezalel Smotrich, kanë bërë thirrje për aneksim të plotë të territoreve palestineze.
Ndërkohë, Sekretari i Përgjithshëm i OKB-së, Antonio Guterres, theksoi se komuniteti ndërkombëtar nuk duhet të trembet nga kërcënimet për hakmarrje:
“Pavarësisht çfarë bëjmë, veprimet do të vazhdojnë. Duhet të veprojmë për të ndaluar aneksimin e heshtur të Bregut Perëndimor.”
