Situatë e paqartë në kombëtaren e Argjentinës, ku grumbullimi i disa prej yjeve për ndeshjet e ardhshme është në ...
BOTA
Shkencëtarët zbulojnë dinosaurin më të madh të Azisë Juglindore
PiranjatPërditësimi i fundit 19 Maj 2026, 11:52
Shkencëtarët kanë zbuluar në Thailand mbetjet fosile të një dinosauri gjigant barngrënës që jetoi rreth 113 milionë vjet më parë dhe konsiderohet dinosauri më i madh i njohur deri tani në Azinë Juglindore.
Specia e re, e quajtur Nagatitan chaiyaphumensis, ishte një sauropod me qafë dhe bisht të gjatë, që arrinte afro 27 metra gjatësi dhe peshonte deri në 28 tonë. Fosilet u zbuluan në provincën Chaiyaphum në verilindje të Tajlandës, pasi fillimisht u vunë re nga një banor lokal.
Gjatë gërmimeve disa-vjeçare, paleontologët zbuluan kocka të shtyllës kurrizore, brinjëve, legenit dhe gjymtyrëve, përfshirë një humerus me gjatësi rreth 1.8 metra. Bazuar në madhësinë e kockave, studiuesit arritën në përfundimin se bëhej fjalë për një nga krijesat më të mëdha tokësore që ka jetuar ndonjëherë në rajon.
Studimi u publikua në revistën shkencore Scientific Reports dhe u udhëhoq nga paleontologu Thitiwoot Sethapanichsakul nga University College London.
Sipas studiuesve, Nagatitani ushqehej kryesisht me bimësi si halorët dhe fierët me fara, duke konsumuar sasi të mëdha ushqimi pa pasur nevojë për përtypje intensive. Falë përmasave të tij kolosale, ai kishte shumë pak armiq natyrorë.
Në të njëjtin ekosistem jetonin edhe dinosaurë mishngrënës, krokodilë, pterosaurë dhe madje peshkaqenë të ujërave të ëmbla. Megjithatë, grabitqari më i madh i kohës ishte shumë më i vogël se Nagatitani.
Shkencëtarët besojnë se zbulimi ofron të dhëna të rëndësishme për evolucionin e sauropodëve në Azinë Juglindore dhe për periudhën kur klima e Tokës po bëhej gjithnjë e më e nxehtë për shkak të rritjes së niveleve të dioksidit të karbonit në atmosferë.
Emri “Nagatitan” vjen nga “Naga”, një krijesë mitologjike e ngjashme me gjarprin në traditat aziatike, e njohur veçanërisht në kulturën tajlandeze./Përktheu Piranjat News
