Ambasada e Shteteve të Bashkuara në Tiranë ka publikuar një njoftim ku paralajmëron qytetarët shqiptarë për përdo...
BOTA
Tronditje në Britani/ Ish-ministrja e Burgjeve gjendet e vdekur, dyshime për vrasje
PiranjatPërditësimi i fundit 10 Korrik 2026, 18:16
Policia britanike ka nisur hetime për vrasje pas vdekjes së ish-ministres konservatore Anne Widdecombe, e cila u gjet e mbuluar në gjak me një plagë në kokë në banesën e saj në Devon.
Efektivët gjetën 78-vjeçaren, ish-ministre e Burgjeve, me plagë të rënda, pasi një ekip i ambulancës njoftoi autoritetet dhe i thirri në banesën e saj në Haytor, në zonën e Dartmoor, pak para mesditës së së enjtes.
Fillimisht, vdekja e saj u njoftua të premten në mëngjes nga agjenti i saj, pa pasur indicie se ishte shkaktuar nga diçka tjetër përveç shkaqeve natyrore. Megjithatë, vetëm pak orë më vonë, Policia e Devon dhe Cornwall bëri të ditur se çështja tashmë po hetohet si vrasje dhe se autoritetet janë në kërkim të një “burri të bardhë”, të cilin e konsiderojnë të dyshuar për krimin.
Drejtuesja e hetimeve deklaroi se hetimet janë ende në fazat e para, por po zhvillohen me ritme intensive.
“Hetimi për vrasje është ende në fazat fillestare, por po ecën me shpejtësi të konsiderueshme. Kemi angazhuar të gjitha burimet e nevojshme për të përcaktuar saktësisht se çfarë ka ndodhur dhe për të identifikuar personin përgjegjës, për të cilin besojmë se është një burrë i bardhë”, deklaroi ajo.
Ajo u bëri thirrje të gjithë personave që mund të kenë informacione, edhe nëse i konsiderojnë të parëndësishme, të kontaktojnë policinë.
Autoritetet kërkojnë veçanërisht dëshmi nga persona që mund të kenë vënë re lëvizje të dyshimta në zonën Haytor Vale, si edhe pamje nga kamerat e sigurisë, kamerat e zileve inteligjente ose kamerat e automjeteve.
Ndërkohë, ekspertët e kriminalistikës po kryejnë ekzaminime në banesën e Widdecombe, e cila është izoluar nga policia.
Sipas informacioneve, policët që mbërritën në banesë folën me kujdestaren e saj, e cila besohet se ishte personi që zbuloi trupin e pajetë.
Nga politika te televizioni
Anne Widdecombe ishte një nga figurat më të njohura të politikës britanike. Me një karrierë të gjatë në Partinë Konservatore, ajo u bë e njohur për qëndrimet e saj të forta dhe stilin e drejtpërdrejtë të komunikimit, duke përfaqësuar krahun e djathtë të partisë.
Më vonë fitoi popullaritet edhe në publikun e gjerë përmes pjesëmarrjes në programe televizive si “Strictly Come Dancing” dhe “Celebrity Big Brother”.
E konvertuar në fenë katolike, Widdecombe shpesh shkaktoi polemika për qëndrimet e saj mbi çështje sociale si aborti, martesa mes personave të të njëjtit seks dhe përdorimi i drogës, për të cilat mbështeste politika me tolerancë zero.
Ajo ishte një mbështetëse e zjarrtë e Brexit-it dhe kundërshtoi politikat për emetimet zero të karbonit, duke vënë në dyshim disa aspekte të shkencës mbi ndryshimet klimatike.
Në vitin 2023 iu bashkua partisë Reform UK dhe u bë një mbështetëse e fortë e Nigel Farage, madje duke u shfaqur në një emision televiziv në mbështetje të partisë vetëm dy ditë përpara se të bëhej publik lajmi për vdekjen e saj.
