Një aksident i rëndë ka ndodhur sot (4 qershor), në aksin Krutje-“Pushimi i shoferit”, në rrugën Lushnjë-Fier.
...
BOTA
Zgjedhjet lokale në RMV/Shqiptarët të udhëhequr nga BDI, ja si renditet Aleanca Kombëtare për Integrim sipas sondazheve
PiranjatPërditësimi i fundit 19 Tetor 2025, 09:47
Qytetarët e Maqedonisë së Veriut po votojnë sot në raundin e parë të zgjedhjeve lokale për të zgjedhur kryetarët e komunave dhe anëtarët e këshillave komunalë në të gjitha 80 komunat e vendit, përfshirë edhe Qytetin e Shkupit. Zgjedhjet përfshijnë edhe komunat shqiptare, ku gara pritet të jetë e fortë mes koalicioneve kryesore politike.
Procesi i votimit ka nisur në orën 07:00 dhe do të përfundojë në orën 19:00, pas çka do të nisë menjëherë numërimi i votave dhe shpallja e rezultateve të para. Të drejtë vote kanë 1.832.415 qytetarë, sipas listës zyrtare të Komisionit Shtetëror të Zgjedhjeve, ndërsa në të gjithë vendin janë hapur 3.480 vendvotime.
Sondazhet e fundit tregojnë një avantazh për partinë opozitare maqedonase VMRO-DPMNE me rreth 26.7% të mbështetjes, ndërsa pas saj renditet LSDM me 11.1%. Në bllokun shqiptar, koalicioni Aleanca Kombëtare për Integrim i udhëhequr nga BDI vlerësohet me 9.9%, ndërsa koalicioni VLEN, që është partner qeveritar i VMRO-së, ka 7.5%. Sondazhi ka evidentuar edhe një përqindje të lartë të votuesve të pavendosur (10%) si dhe 12.4% të anketuar që nuk kanë pranuar të deklarojnë preferencën e tyre.
Për një kandidat të shpallet fitues në raundin e parë për kryetar komune, ai duhet të marrë mbi 50% të votave dhe të ketë pjesëmarrje prej të paktën një të tretës së votuesve të regjistruar në atë komunë. Nëse ky kusht nuk plotësohet, atëherë do të organizohet raundi i dytë i votimeve.
Këto janë zgjedhjet e teta lokale në vend që prej shpalljes së pavarësisë në vitin 1991 dhe mbahen vetëm një vit pas zgjedhjeve presidenciale dhe parlamentare të prillit dhe majit 2024. Për këtë arsye, qytetarët po votojnë për herë të dytë brenda një viti për përfaqësuesit e tyre politikë. Rezultatet e para pritet të dalin në mbrëmje, ndërsa partitë politike po përgatiten për një garë të ngushtë, veçanërisht në komunat më të mëdha si Shkupi, Tetova, Gostivari dhe Struga.
