Në prag të miqësores Shqipëri – Izrael, e cila do të mbahet sonte në stadiumin “Air Albania” të Tiran&...
EDITORIAL
Drejtësia nuk ka gjini/ Kur faktet sfidojnë paragjykimin!
PiranjatPërditësimi i fundit 20 Mars 2026, 21:45
Nga Florjan Binaj
Prej tre javësh, ju kemi treguar historinë e Leonardit dhe Gjovanës. Një histori familjare, zënkash, një histori sistemi. E kemi treguar me fakte. Me dëshmi. Me durim.
Sepse kjo është puna jonë.
Ne, Piranjat, kemi qëndruar pranë grave të dhunuara, vajzave të përndjekura, fëmijëve të abuzuar… dhe do ta bëjmë gjithmonë. Sepse në një shoqëri patriarkale, gruaja mbetet shpesh hallka më e brishtë e një zinxhiri dhune që nuk njeh fund.
Dhe mbështetja e më të dobëtit, në kërkim të së vërtetës, ka qenë misioni ynë: misioni i parë, i fundit dhe gjithçka në mes.
Por, ky rast ishte ndryshe. Viktima ishte e sistemit. Dhe brenda këtij sistemi, i shkatërruar, i burgosur, i fajësuar pa faj, ndodhej një njeri që rastisi të jetë burrë.
Sistemi i ndërtuar për të mbrojtur, këtë herë keqfunksionoi. Dhe ne nuk mund t’i kthenim shpinën. Jo sepse nuk na dhimbset gruaja, por sepse na dhimbset e vërteta. Dhe sepse pas atij burri ishin fëmijë, që po humbisnin një baba.
Reagimet e “gjyqtareve pas ekranit” të rrjeteve sociale nuk vonuan.
“Maskilistë.” “Po mbroni dhunuesin.” Pseudo-feministe, persona të keqinformuar apo deri në dashakeqë… u turrën për të sulmuar investigimin tonë.
Nuk ju kërkoi kush “të doni Leonardin”. Kërkuam vetëm të shihni faktet.
Sepse ne zgjedhim gjithmonë të njëjtin krah, anën e fakteve, pa paragjykim.
Të jesh burrë nuk do të thotë automatikisht që je fajtor. Të jesh burrë nuk do të thotë që nuk ke të drejta. Të jesh burrë nuk do të thotë të pushkatohesh pa gjyq. Të jesh baba nuk do të thotë që dashuria jote për fëmijët dhe e fëmijëve për ty vlen më pak.
Aq më pak kur kjo drejtësi, jo vetëm në këtë rast por edhe në shumë raste të tjera, përpiqet të vijë nga një pjesë e juaja që nëpër rrjetet sociale jeni vetëshpallur gjyqtarë të jetës së të tjerëve pa i njohur, pa e ditur dhe pa dashur të shihni asnjë provë e asnjë fakt!
Ju nuk bëheni dot qenie më të kulluara duke hedhur baltë mbi të tjerët!
Prandaj, ne nuk jemi tërhequr edhe kur presioni na vjen nga të gjitha anët. Sepse të tërhiqeshim do të thotë të pranojmë që e vërteta varet nga kush të bën presion.
Duke nxjerrë FAKTET kemi çuar misionin tonë në vend. E besojmë me ndërgjegje të pastër.
Dhe nuk do të jetë i fundit, sepse e vërteta nuk zgjedh krah.
Drejtësia nuk ka gjini./Piranjat news
Të gjitha të drejtat e këtij materiali janë pronë ekskluzive dhe e patjetërsueshme e Piranjat.al sipas ligjit Nr. 35/2016 “Për të drejtën e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi pa autorizimin e Piranjat.al në të kundërt çdo shkelës do të mbajë përgjegjësi
