Situata e zjarreve në Shqipëri vijon të kërkojë ndërhyrje në disa zona të vendit.
Sipas Ministrisë së Mbroj...
EDITORIAL
Pse kryeministri Edi Rama është i lumtur që është kryeministër i Shqipërisë dhe jo i Britanisë së Madhe?
PiranjatPërditësimi i fundit 23 Tetor 2025, 15:55
“Dhe, duke parë se si po shkojnë gjërat në Mbretërinë e Bashkuar, jam shumë i lumtur që jam kryeministri i Shqipërisë,” tha Rama.
Gjatë qëndrimit në Londër, kryeministri Edi Rama ka dhënë një intervistë për BBC Radio 4 në lidhje me emigracionin e jashtëligjshëm.
Për shqiptarët, kjo deklaratë thotë shumë më tepër mes rreshtave se kaq. Edi Rama ka shumë të drejtë që do të refuzonte çdo vend tjetër për të qenë kryeministër (edhe pse është pak utopike që një shtet tjetër ta donte si kryeministër), pasi realisht për pushtetarët, vendi ynë është kthyer në parajsën e parave.
Pikërisht sot, delegacioni i OSBE-ODIHR ka publikuar raportin përfundimtar mbi zgjedhjet e 11 majit në Shqipëri. Në raport thuhet se zgjedhjet ishin konkurruese, por u zhvilluan në një mjedis politik të polarizuar, pasi pjesëmarrësit nuk gëzonin kushte të barabarta.
Kryeministri ka të drejtë të jetë i lumtur që udhëheq Shqipërinë, sepse nëse do të kishte fatin të udhëhiqte Britaninë, me gjasë nuk do të kishte bërë katër mandate në qeveri.
Në vendet më demokratike, zgjidhjet për emigracionin masiv nuk gjenden duke refuzuar problemet, por duke krijuar një klimë miqësore për biznesin, popullin dhe meritokracinë.
Pas vendeve të luftës, Shqipëria është ndër vendet që po furnizon shtetet e tjera me krah pune, ndërkohë që mosha mesatare në vend po plaket dhe është në rënie historike.
Për shkak të moskokëçarjes për të përmirësuar mirëqenien dhe jetën në Shqipëri, si dhe për shkak të korrupsionit që përqendron ekonominë në disa duar, shqiptarët kanë ikur masivisht drejt vendeve perëndimore.
Prandaj, është mëse normale që kryeministri të jetë i lumtur që po drejton Shqipërinë – një nga vendet më të varfra të Europës dhe me emigracionin më të lartë në dekadat e fundit. “Lum Kryeministri për ne” por sa keq qe populli nuk mund të thotë të njëjtën gjë./Piranjat.al
