Pedagogët janë ndaluar na forca policie për t’ju bashkuar protestës së studentëve para Kuvendit të republikës s&...
EDITORIAL
'Piranjat' denoncuan nepotizmin në Bashkinë e Rrogozhinës, Caslli: Arroganca e një pushteti të kalbëzuar
Piranjat.alPërditësimi i fundit 11 Tetor 2025, 08:48
Nga Elona Caslli
Kufizimi i mandateve i shërben demokracisë më shumë se çdo element tjetër, përndryshe arrin në skajin fundor të kalbëzimit.
Kur një pushtet kalbëzohet nuk pyet më për asgjë dhe për askënd dhe nuk është aspak rastësi që gjatë mandatit të tretë dhe në hyrje të mandatit të katërt shfaqjet rilindase janë gjithmonë e më qesharake dhe të kalbura.
Kalbëzimi i pushtetit shihet së fundmi në Bashkinë e Rrogozhinës, ku kryebashkiaku e ka kthyer bashkinë në shtëpinë e tij dhe po të shohësh punësimet brenda kësaj bashkie, të krijohet përshtypja se kryebashkiaku ka një gëzim familjar dhe ka ftuar gjithë fisin për të festuar.
I gjendur përballë gazetares së Piranjave, e cila me të drejtë i nënvizon faktin e pamohueshëm se punësimet në bashkinë që ai drejton,i duket se bëhen mbi bazat e certifikatës familjare dhe aspak mbi meritokracinë, kryebashkiaku i Rrogozhinës nervozohet keq sepse ai e ka të huaj procesin e llogaridhënies dhe ndaj i arratiset këtij të fundit. Një pushtet i kalbëzuar është mësuar të kërkojë llogari, por kurrsesi të japë llogari.
Gjithmonë punësimet në institucionet shtetërore janë bërë në bazë njohjesh dhe miqësish, pasi një shoqërie postkomuniste i duhet shumë kohë të kuptojë rëndësinë e fjalës " meritokraci", por nëse në të shkuarën bëhej shkëmbim punësimesh ( qê do të thotë titullari i një institucioni punësonte të rekomandurin që vinte nga titullari i një institucioni tjetër në mënyrë që të mbroheshin nga konflikti i interesit dhe nepotizmi) tani ky protokoll është rrëzuar.
Pushteti i kalbëzuar punëson të gjithë pemën familjare në institucionin që drejton dhe nervozohet nëse gjendet përballë dikujt që i kërkon llogari.
Pushteti i tepërt, si çdo gjë e tepërt në jetë, është i dëmshëm fillimisht për ata që e kanë dhe e ushtrojnë dhe po aq i dëmshëm për taksapaguesit të cilët e kanë të vështirë të dallojnë teksa hyjnë në një institucion, në kanë të bejnë me një festë familjare, apo me një institucion për të cilin paguajnë taksa.
Post Scriptum- Institucionet shtetërore janë kthyer në gropa septike ku rekrutimet kryhen mbi baza fisnore, erotike dhe partiake.
