Personi në foto, efektivi i ‘Shqiponjave’ Edison Adri, i cili mbeti i plagosur gjatë operacionit policor të zhvilluar në zon&e...
INVESTIGIME
Burri iu vra, nëna prej 7 vitesh nuk takon dot djalin! Gjyshi: “Nuk ka Perëndi që ma merr!” Institucionet ‘ngrejnë duart’ dhe nuk zbatojnë ligjin
PiranjatPërditësimi i fundit 21 Nëntor 2025, 22:24
Në këtë format kemi hasur histori që asnjëra nuk ngjan me tjetrën dhe kemi takuar njerëz që padrejtësitë i kanë nga më të ndryshmet. Në këtë episod të Piranjave sjellim historinë tronditëse të Afërditës, një vajzë që u martua e re, krijoi një familje dhe pak muaj pasi solli në jetë djalin e saj, humbi gjithçka.
Prej vitesh ajo lufton për të drejtën më elementare, të shohë, të përqafojë dhe të rrisë fëmijën e saj.
Gjithçka që do t’i ndryshonte rrjedhën e jetës ndodhi më 11 tetor 2018, kur bashkëshorti i saj u vra në një masakër që tronditi vendin. Siç e kërkon zakoni në veri të vendit, pas vdekjes së bashkëshortit, Afërdita qëndroi në shtëpinë e burrit së bashku me djalin. Në këto ditë të vështira, babai i Afërditës bisedon me krushkun dhe i thotë se pas dyzet ditësh nga vdekja e dhëndrit do të merrte vajzën dhe nipin, pasi fëmija nuk mund të mbetej edhe pa nënë përveçse pa baba.
Por aty nisi edhe një betejë e ashpër mes dy familjeve, sepse vjehrri i Afërditës nuk pranonte t’i jepte nipin.
Për të shmangur konfliktet, Afërdita pranon të largohet nga shtëpia e vjehrrit, duke lënë përkohësisht djalin atje, me bindjen se do të rikthehej ta merrte sapo gjërat të qetësoheshin. Ajo mendonte gjithashtu se do të mund ta shihte apo të fliste me të në telefon. Por asgjë nga këto nuk ndodhi. Pas largimit të saj, as nuk ia nxorën djalin në telefon, as e lejuan ta takonte. Në këtë mënyrë, fëmija iu nda nënës.
Një ndarje që sot ka hyrë në vitin e shtatë. Shtatë vite që, pavarësisht përpjekjeve të saj, vendimeve të gjykatave dhe kallëzimeve në polici, Afërdita nuk mund të jetojë me djalin. Ky i fundit, sipas raporteve të psikologes, është në gjendje të rënduar emocionale për shkak të situatës ku ndodhet. Ne shkuam bashkë me nënën për të takuar fëmijën, por u përballëm me të njëjtat vështirësi që Afërdita përjeton prej vitesh — një kalvar i mundimshëm vetëm për ta parë.
Procedura e kërkon që të ketë disa data të njëpasnjëshme ekzekutimi të urdhrit. Meqë herën e kaluar familja nuk ishte në banesë në ditën 2 të ekzekutimit, përmbaruesi, punonjësit socialë të Bashkisë Mat dhe policia janë mbledhur sërish, këtë herë pranë ambjenteve të Pallatit të Kulturës në Mat, pasi është i vetmi vend që monitorohet me kamera sigurie.
Sërish, Hamiti — gjyshi i fëmijës — nxjerr pengesa.
Këtë herë përballemi me të, duke tentuar të marrim një përgjigje: pse nuk e lejon nënën të takojë djalin e saj? Por përballja është e vështirë, sepse Hamiti është i vendosur të mos e lëshojë nipin, madje duke deklaruar se “nuk ka Perëndi që ma merr”.
Historia vijon… /piranjat.news
Të gjitha të drejtat e këtij materiali janë pronë ekskluzive dhe e patjetërsueshme e Piranjat.al sipas ligjit Nr. 35/2016 “Për të drejtën e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi pa autorizimin e Piranjat.al në të kundërt çdo shkelës do të mbajë përgjegjësi
