Në korrik të këtij viti, në media u raportua se “vila e partisë” në fshatin Mborje të Korçës ishte dj...
INVESTIGIME
Ish-ministrja e Arsimit Ogerta Manastirliu me doktoraturë plagjiaturë, e ka kopjuar nga një student afrikan
PiranjatPërditësimi i fundit 10 Tetor 2026, 11:06
Deputetja socialiste Ogerta Manastirliu rezulton me doktoraturë plagjiaturë. Punimi i saj me titull “Krahasimi i monitorimeve të mjedisit në landfillin e Sharrës, para dhe pas ndërhyrjes, si dhe ndikimet në mjedis”, i publikuar në vitin 2013, është zhvilluar mbi punën autentike të studentit të masterit Fannie Mnisi në Afrikë.
Tema e tij, e publikuar në vitin 2008, titullohet “Vlerësimi i rrezikut mjedisor lidhur me venddepozitimet e parregulluara të mbetjeve në Bashkinë Albert Luthuli, Provinca Mpumalanga, në Republikën e Afrikës së Jugut”.
Në hyrje të doktoraturës së vet, përmend problematikat e landfillit të Sharrës, ndërkohë që ato ishin problematika të landfillit në Afrikë. Nëse shihen rreshtat e punimit të saj, zonja Manastirliu ka cituar autorë të huaj, duke harruar se këto përfundime dhe konkluzione autorët në fjalë i kanë nxjerrë për Afrikën, jo për Tiranën.
Një paragraf të tërë, Manastirliu e ka kopjuar fjalë për fjalë nga studenti i masterit Fannie Mnisi, duke zhdukur emrin e autorit real dhe duke e përvetësuar.
Ka hequr tri bashkitë e Afrikës së Jugut dhe në vend të tyre ka vendosur Tiranën. Po të shihni objektivat e studimit që Manastirliu ka përcaktuar, është copy-paste, fjalë për fjalë; vetëm ndryshon emri i bashkisë në Afrikë me emrin Tiranë.
“Këtu kemi të bëjmë me një mashtrim dhe falsifikim”, shprehet studiuesi Taulant Muka.
Në pjesën e zhvillimit, aty ku flitet për menaxhimin e mbetjeve të ngurta, Manastirliu ka cituar tre autorë të huaj, Kumar, Salha Kasim dhe Mansoor Ali, në të njëjtën mënyrë dhe kronologji siç i ka cituar studenti afrikan Fannie Mnisi.
Edhe nëse do të vijojmë më tej, do të shohim se citimet nga autorë si Yong-Chung apo El-Fadel, të cilët flasin për menaxhimin e mbetjeve urbane, mbetjeve të rrezikshme, landfill-et në Europë, Amerikë, Kanada e Japoni, janë të njëjta dhe të renditura njëlloj siç i ka renditur studenti afrikan.
“Ne kemi të bëjmë me një ministre kopjace, plagjiatore, që nuk ka bazat e kërkimit shkencor. Dhe kjo u pa gjatë COVID-it, kur ajo u bë ministre e Shëndetësisë, që nuk dinte të lexonte shkencën.
U bë përgjegjëse për 17 mijë, 18 mijë ndërrime jete shtesë në Shqipëri, pavarësisht se u paralajmërua. Nëse kjo ministre do të ishte e aftë, do të ishte e saktë, nuk do të merrte një Komitet Shkencor pa shkencë.
Dhe sot ajo, pa problem fare, do të jetë edhe kryetare bashkie. Vetë kryeministri tha: ‘Ne jemi atdheu i plagjiaturave’, ndërkohë plagjiaturën e çon nga ministre Arsimi, ministre Shëndetësie dhe kandidate për kryetare bashkie”, shton z. Muka.
Gazetari Freard Rista pati një ballafaqim me zonjën Manastirliu dhe aty u përball me njerëz të panjohur dhe të paidentifikuar, të cilët tentuan me çdo formë ta pengonin që të bënte pyetjet.
Në dalje të zyrave pranë Njësisë nr. 9 në kryeqytet, ish-ministrja e Arsimit dhe Shëndetësisë shpejtoi hapat për t’u futur në makinë, ndërkohë që e vetmja përgjigje që dha për plagjiaturën ishte: “Kam reaguar njëherë për këtë gjë”./piranjat
Të gjitha të drejtat e këtij materiali janë pronë ekskluzive dhe e patjetërsueshme e Piranjat.al sipas ligjit Nr. 35/2016 “Për të drejtën e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi pa autorizimin e Piranjat.al në të kundërt çdo shkelës do të mbajë përgjegjësi.
