Situata e zjarreve në Shqipëri vijon të kërkojë ndërhyrje në disa zona të vendit.
Sipas Ministrisë së Mbroj...
INVESTIGIME
“Kam 3 vjet që nuk i shoh, që ditën e arrestimit“, me lot në sy, 40-vjeçari Shkodran kërkon të gjejë vajzat e tij
b.zPërditësimi i fundit 28 Mars 2025, 22:06
Foto ilustruese
SHKODËR - Historia e Pjetër Kolës, 40-vjeçarit Shkodran nga Vau i Dejës lidhet me ish-bashkëshorten dhe dy vajzat e tij, 5 dhe 3 vjeçe. Këtë të fundit ai e la disa muajshe kur Policia e arrestoi për “dhunë në familje”. Në vitin 2022 Pjetri u dënua pas kallëzimit të ish-bashkëshortes dhe prej asaj kohe nuk ka patur kontakt me fëmijët.
Kur ishte në paraburgim ai mësoi se ish-bashkshortja ishte larguar jashtë-shtetit, ndaj bëri kallëzim për zhdukjen e fëmijëve, por nuk mori përgjigje. Ndërkohë sot, ai bashkëjeton me dikë tjetër dhe kërkon të nisë një jetë të re, por veç brengës për fëmijët, ajo që e shqetëson është procesi i papërfunduar i divorcit me ish-gruan. Kjo e fundit pretendonte se dhunohej nga Pjetri, ndërsa 40-vjeçari më herët ka kërkuar divorc për “mospërputhje karakteri”, dhe siç thotë ai, gjithçka nisi pasi i kërkoi të bënin AND-në e fëmijëve.
Pas intervistës me 40-vjeçarin Shkodran, ritakohemi për të nisur kërkimet, me shpresën e gjetjes së fëmijëve. Ndalesën e parë e bëjmë në qytetin e Shkodrës. Ish-gruaja e tij nuk ndodhej në banesën ku kishin jetuar më parë. Ajo kishte mbyllur edhe numrin e vjetër të telefonit. Kështu u detyruam që bashkë me Pjetrin të shkonim në shtëpinë e prindërve të saj në fshatin Bardhaj. Pavarësisht ndjeshmërisë që ka kjo çështje te familja e vajzës, ishim shpresplotë që do të marrim informacion për vendndodhjen e saj dhe të fëmijëve.
Një vajzë afrohet tek porta. Ishte ish-kunata e Pjetrit. Pasi mësoi qëllimin e vizitës sonë, ajo telefonoi mamanë e saj, e cila u shpreh e gatshme që Pjetri t’i takojë fëmijët, por nëna e vajzave nuk ishte dakord. Megjithatë një dritë jeshile e morëm. Bashkë me Pjetrin shkuam në Polici për të qenë të sigurtë dhe më pas në dyqanin më të afërt blemë dhurata për vajzat e vogla. Sapo mbërritem, vajzat e vogla dolën njëra pas tjetrës. Pas pak, me dhuratat në dorë na u bashkua edhe Pjetri. Vajzat iu hodhën në qafë dhe ai ishte një nga momentet më emocionuese. Të bindur, se as Pjetri dhe as vajzat nuk do donin që ky takim të mbaronte kaq shpejt, por ishte vërtet si një fillim i ri. Mes babait dhe vajzave të vogla, nisi një tjetër kapitull.
“Ndihem shumë mirë! Ju falenderoj me gjithë zemër. Jam shumë i gëzuar. Tani po qaj nga qejfi jo nga halli. Gjë e mrekullueshme. S’kam parë ndonjëherë gëzim më të madh”, tha Pjetri pas takimit.
Ndërkohë sa i takon procesit të divorcit, i bëmë një shkresë zyrtare Gjykatës së Shkodrës, lidhur me statusin e çështjes së Pjetrit dhe ish-bashkëshortes, por nuk morëm përgjigje. Megjithatë, në rrugë jozyrtare zbuluam se për çështjen e regjistruar në muajin mars 2022, janë zhvilluar gjithsej 5 seanca, prej tetorit 2023 deri më 28 maj 2024. Dhe në të pesta seancat, pala e paditur, pra ish-bashkëshortja e Pjetrit, nuk është paraqitur në sallën e gjyqit.
Ndaj më 28 maj 2024, është marrë në mungesë vendimi për zgjidhjen e martesës, por ky vendim edhe sot e kësaj dite, ende nuk është zbardhur dhe nuk është reflektuar në gjendjen civile të Vaut të Dejës, ç’ka e penalizon Pjetrin të lidhë martesën me gruan me të cilën bashkëjeton prej vitesh.
