Në prag të miqësores Shqipëri – Izrael, e cila do të mbahet sonte në stadiumin “Air Albania” të Tiran&...
INVESTIGIME
La Kanadanë për t’u kthyer në Tiranë! Në tokën që bleu gjen vilë 3-katesh! Pasi mori lekët, pronari ia dhuroi vajzës
PiranjatPërditësimi i fundit 24 Maj 2026, 13:17
Pas viteve ’90, mijëra shqiptarë morën rrugën e emigrimit drejt vendeve europiane, kryesisht Italisë dhe Greqisë, në kërkim të një jete më të mirë. Me kalimin e viteve dhe krijimin e një stabiliteti politik, ekonomik dhe social, shumë prej emigrantëve shqiptarë u kthyen duke investuar në prona dhe biznese.
Një prej tyre ishte edhe 54-vjeçari nga Dibra, Fatmir Lakushi, i cili në vitin 2004 bleu një tokë 300 m2 në Durrës, tek Shkëmbi i Kavajës. Bisedoi me Muhamed Hersin, të zotin e tokës, dhe ranë dakord për 33 milionë lekë të vjetra. Ai ia tregoi pronën dhe Fatmiri e besoi pa marrë topograf që të bënte verifikimet.
Dhe pas këtij investimi, 32-vjeçari asokohe, Fatmiri, u largua sërish në emigrim, në Europë e deri në Kanadanë e largët.
Kur u kthye nga Kanadaja në vitin 2009, mendoi të mos emigronte më, por të ndërtonte jetën e tij në Shqipëri.
Kur mori leje ndërtimi për të rrethuar pronën, topografi e njoftoi se toka në certifikatë nuk ishte ajo që kishte blerë në fillim, por një pjesë toke më poshtë.
Dhe asgjë nuk do të përbënte problem, nëse ajo pjesë toke poshtë do të ishte e lirë dhe pa probleme.
Problemi qëndronte tek fakti se në atë tokë që dispononte Fatmiri me dokumente të rregullta, shtetasi Muhamed Hersi kishte ndërtuar një vilë 3-katëshe me papafingo, pa leje. Sipas procesverbalit të mbajtur më datë 31 maj 2009, firmosur nga drejtori i Bujqësisë dhe Inspektori i Policisë së Komunës, vihet re se nga matjet e topografit në terren, ka rezultuar se Muhamed Hersi, me ndërtimin që kishte bërë pa leje, kishte zaptuar plot 100 m2 të tokës që vetë ia kishte shitur Fatmirit.
Dhe për të mos nxitur hakmarrje, Muhamedi në atë shtëpi nuk futi djalin, por vajzën, Sofie Hersi.
Fatmiri vijoi rrugën ligjore dhe arriti deri aty sa të siguronte një vendim për prishje objekti nga Inspektorati Ndërtimor Urbanistik Vendor. Mirëpo, kur institucionet zbritën në terren për të ekzekutuar vendimin, prezent ishte edhe kryetari i Komunës, i cili u kërcënua me jetë nga familja Hersi asokohe, sipas dëshmive të Fatmirit.
Kështu, më datë 18 gusht 2010, Komuna e Rrashbullit njofton znj. Sofie Hersi që të paraqesë pranë zyrave të INUV dokumentacionin tekniko-ligjor të banesës që disponon.
Dhe në mungesë të këtyre dokumenteve, sepse shtëpia ishte ndërtuar pa leje në tokë private, një javë më pas Inspektorati Ndërtimor Urbanistik Vendor e njofton zonjën për të bërë brenda 10 ditëve prishje vullnetare të vilës 3-katëshe.
Dhe më datë 2 shtator 2010, bëhet një inspektim tjetër në terren ku faktohet se zonja Hersi kishte ndërtuar në tokë të dikujt tjetër një shtëpi 3-katëshe me papafingo, pa dokumentacionin e duhur ligjor.
Dhe një javë më pas, kryeinspektori firmos urdhrin për prishje të objektit.
“Kur vajtëm te kryetari i Komunës, që do sillte fadromat, ai ishte trembur se i kishin shkuar e kishin kërcënuar djali i Muhamed Hersit.
Më thotë: ‘Fatmir, unë nuk mund t’i futem kësaj çështjeje, kam fëmijë, kam familje dhe nuk do lë familjen rrugëve për këtë pronë. Por unë mund të bëj diçka tjetër, mund të lë një shënim aty që: “Kjo shtëpi nuk ka të drejtë të legalizohet”, tregon Fatmiri.
Dhe me këtë dokument, Fatmiri u largua sërish në emigrim me bindjen dhe shpresën se shteti nuk do të vijonte të gabonte më në kurriz të tij.
Mirëpo, shteti jo vetëm që gaboi, por e thelloi edhe më shumë paligjshmërinë, duke u bërë shkak për konflikt civil, që mund të përfundonte edhe me humbje jetësh.
Zonja Sofie Hersi, duke përfituar nga zemërgjerësia e partisë në pushtet për të legjitimuar vetëm në prag zgjedhjesh paligjshmërinë e qytetarëve ndër vite, aplikoi dhe u pajis me leje legalizimi më datë 13 nëntor 2016, firmosur nga përgjegjësi i Sektorit të Legalizimit në ALUIZNI-n e Durrësit, Mario Semini, dhe drejtori Flamur Gjuzi.
Të cilët, të vetëdijshëm për paligjshmërinë që po konsumonin, firmosën sikur të mos kishte 2-3 vendime për prishje, qoftë nga Gjykata, qoftë nga Inspektorati.
Firmën tjetër për të dhënë certifikatën e pronësisë e hodhi ish-drejtoresha e Kadastrës së Durrësit, Xheni Agolli./piranjat news
Të gjitha të drejtat e këtij materiali janë pronë ekskluzive dhe e patjetërsueshme e Piranjat.al sipas ligjit Nr. 35/2016 “Për të drejtën e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi pa autorizimin e Piranjat.al në të kundërt çdo shkelës do të mbajë përgjegjësi
