Një aksident i rëndë ka ndodhur sot (4 qershor), në aksin Krutje-“Pushimi i shoferit”, në rrugën Lushnjë-Fier.
...
INVESTIGIME
Në vend të shtëpisë, një magazinë! 23 vite padrejtësi për familjen Gega
PiranjatPërditësimi i fundit 7 Nëntor 2025, 22:06
Një problem që ka më shumë se dy dekada pa marrë zgjidhje dhe një familje me 10 anëtarë që ka mbetur në qiell të hapur, na bënë që të udhëtonim këtë të premte drejt Shkozetit, në Durrës, për të takuar Sonila Gegën. Kjo e fundit na pret në ndërtesën e përfituar në vitin 2002 nga Bashkia e Durrësit, pas prishjes së banesës së saj për shkak të një plani zhvillimi. Por edhe pse kanë kaluar 23 vite, ajo ende nuk ka arritur të marrë banesën e premtuar.
Kur themi “banesë”, është pak si shumë në fakt, pasi ajo është një magazinë, pa tavan, pa dyer dhe pa dritare, ku u vendos familja në vitin 2002 nga ish-kryebashkiaku i Durrësit, Miri Hoti. Por që nga ai vit e deri më sot, ajo nuk ka kaluar në emër të kryefamiljarit Armand Gega, për shkak të burokracive dhe neglizhencës së institucioneve. Edhe sot e kësaj dite, familja qëndron në kushte mesjetare, me sytë nga shteti, i cili nuk ka lëvizur as gishtin për t’i ndihmuar.
Sonila tregon vështirësitë e jetesës në atë magazinë, kushtet e rënda dhe, si të mos mjaftonte kjo, edhe betejën që ajo ka pasur me Bashkinë e Durrësit për të marrë shtëpinë që iu premtua. Ndërkohë, nisin edhe konfliktet me komshiun poshtë saj, i cili, duke shfrytëzuar neglizhencën e shtetit, tenton t’ia marrë banesën duke u përpjekur ta kalojë në emrin e Armand Gegës.
Këtu nis edhe konflikti që më pas degjeneroi në dhunë fizike mes burrave, çka çoi në pranga bashkëshortin e Sonilës dhe më pas në dënimin e tij me 6 muaj burg nga gjykata. Ndërkohë, sorollatjet nëpër zyrat e institucioneve në Durrës vazhduan, bashkë me ping-pongun burokratik që e dërgonte Sonilën nga një zyrë në tjetrën, gjithmonë pa zgjidhje. Pasi dëgjuam rrëfimin e saj, u nisëm të takojmë personat përgjegjës për këtë neglizhencë 23-vjeçare.
Por për çudinë tonë, të gjitha institucionet vendosën të tregohen bashkëpunuese dhe të gatshme për të zgjidhur një problem që kishte 23 vite që flinte në zyrat e tyre.
Pasi morëm zotimin e Diana Mandias, përgjegjëse e Zyrës së Strehimit në Bashkinë e Durrësit, dhe të Jolanda Mustafarajt, drejtoreshë e Entit Kombëtar të Banesave (Dega Durrës), kërkuam më shumë siguri. Për këtë arsye, takuam vetë kryebashkiaken e Durrësit, Emiriana Sako.
Kjo e fundit u tregua e gatshme ta shohë me prioritet këtë problematikë, që prej 23 vitesh nuk ka gjetur zgjidhje. Megjithatë, familja Gega ka pritur 23 vite për të marrë banesën e premtuar, ndaj do të duhet të presë edhe disa ditë të tjera, derisa të marrë formë korrespondenca ndërinstitucionale.
Vetëm se këtë herë Sonila dhe familja e saj nuk do të jenë vetëm, pasi ne do të jemi me ta. /Piranjat
Të gjitha të drejtat e këtij materiali janë pronë ekskluzive dhe e patjetërsueshme e Piranjat.al sipas ligjit Nr. 35/2016 “Për të drejtën e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi pa autorizimin e Piranjat.al në të kundërt çdo shkelës do të mbajë përgjegjësi
