Kreu i Grupit Parlamentar të PD, Gazment Bardhi ka reaguar për ngjarjen e rëndë të ndodhur në Lozhan, ku mbeti i vrarë nj&e...
INVESTIGIME
Tenderët binjakë të OSSH: E njëjta ditë, të njëjtët fitues, ofertë pranë tavanit – garë apo skemë e Olsi Ngjela?
PiranjatPërditësimi i fundit 4 Tetor 2025, 16:51
Kur të dhënat flasin vetë, heshtja institucionale bëhet alarmuese. Dy tendera miliona-eurosh të shpallur nga Drejtoria e Tensionit të Lartë në OSSH sh.a. i ngjajnë një loje me letra të hapura – por me fitues të mbyllur që në nisje.
Pas fasadës së një gare “të hapur”, fshihet një skemë që përmban të gjitha elementet e një prokurimi të kontrolluar deri në detaj: të njëjtët emra, të njëjtën ditë, të njëjtin rezultat.
Më 1 shtator, Drejtoria e Tensionit të Lartë në OSHEE drejtuar nga Olsi Ngjela shpalli dy tendera të rëndësishëm për ndërtimin e linjës 35kV dhe një nënstacioni në Tamare, si dhe një tjetër projekt paralel. Të dy procedurat kanë një ngjashmëri tronditëse: tre operatorë ekonomikë në garë, i njëjti konsorcium fitues dhe ofertat pothuaj identike me fondin limit të parashikuar.
Në rastin e parë, kontrata kishte një vlerë tavan prej 3 miliardë lekësh. Fitues u shpall bashkimi i kompanive ALEN-CO shpk dhe ELB Ndërtuesi shpk, me një ofertë që mbulonte plot 98% të fondit limit – praktikë që në vetvete ngre flamuj të kuq për mungesë gare të vërtetë.
Tenderi tjetër, i shpallur po atë ditë, ndjek të njëjtën trajektore: të njëjtët pjesëmarrës, e njëjta renditje, dhe një fitues që duket se nuk u vu kurrë në dyshim.
Në rastin e dytë, kontrata kishte një vlerë tavan prej 4 miliardë lekësh. ELB Ndërtuesi, në pronësi të Qemal dhe Rejnald Zyfit, është një aktor i njohur në kontratat publike, por kjo ngjashmëri kronike e procedurave sugjeron se tenderët nuk janë as të hapur, as transparentë – por të ndërtuar me skenar të mbyllur.
Tek Alen co SH.P.K administrator rezulton Ludmilla Ngjeliu.
Ofertat që ngjiten deri në kufirin e sipërm të buxhetit, përkufizimet identike të kritereve dhe mungesa e diferencimit në vlerësim, tregojnë një garë me formalitet, ku rezultati dihej që më parë.Në mungesë të hetimeve dhe transparencës nga institucionet përgjegjëse, këto procedura ngjajnë më shumë me manovra të organizuara për të orientuar miliona euro të taksapaguesve drejt emrave të njohur – jo drejt eficencës dhe konkurrencës reale./piranjat.al
Të gjitha të drejtat e këtij materiali janë pronë ekskluzive dhe e patjetërsueshme e Piranjat.al sipas ligjit Nr. 35/2016 “Për të drejtën e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi pa autorizimin e Piranjat.al në të kundërt çdo shkelës do të mbajë përgjegjësi sipas nenit 179 të Ligjit 35/2016
