Situata e zjarreve në Shqipëri vijon të kërkojë ndërhyrje në disa zona të vendit.
Sipas Ministrisë së Mbroj...
INVESTIGIME
Xhindet e biznesit të pistë/ Si mashtron ‘hoxha’ i Lushnjës hallexhinjtë
PiranjatPërditësimi i fundit 3 Tetor 2025, 21:59
Në një vend si i yni ku njerëzit përballen çdo ditë me vështirësi ekonomike, probleme sociale, stres, ankth e sëmundje të ndryshme, ndodh që në momente krize identiteti, shumë prej tyre gjejnë strehë te besimi. Sepse për njerëz të brishtë, të lodhur nga vështirësitë dhe hallet, të besosh është një dritë shprese. Por kjo që do ju tregojmë sonte, në realitet është një grackë që e thellon edhe më shumë dhimbjen...
Pasi kemi të bëjmë me shfrytëzimin e besimit në formën më të keqe nga individë që prezantohen si “shërues të shpirtit”, premtojnë se largojnë magjitë, shërojnë sëmundje dhe japin qetësi përmes riteve dhe pluhurave të çuditshëm që këta persona i përziejnë me fenë. Si në rastin e Dritan Beqirit, këtij pseudo-hoxhe i cili pretendon se ka fuqinë për të hequr magjitë, përmes recetave të tij magjike.
Por çfarë fshihet pas këtyre riteve? Si operon bamirësi ynë? Për ta kuptuar më mirë, udhëtojmë drejt Lushnjës për të parë nga afër këtë “mrekullibërës”.
Ka ardhur momenti i bashkëpunëtores sonë për t’u takuar me bamirësin, i cili në raste të tilla, kur përballë ka vajza të reja, tregohet korrekt, duke futur gjithmonë në dhomë një person të tretë, që në këtë rast është ndihmësi i tij. Në mungesë të tij për disa ditë, hoxha bamirës porosit ndihmësin e tij që t’iu japë lëngun magjik njerëzve që do të vijnë për ndihmë. Ndërkohë, “shpëtimtari” nuk mjaftohet vetëm me “hallin” tonë. Ai nis të tregojë edhe histori të njerëzve të tjerë që kanë kërkuar ndihmën e tij, duke zbuluar probleme familjare, apo sekrete të jetës së tyre private. Vetëm pak momente pas largimit, ai nuk vonon të cenojë privatësinë dhe dinjitetin e atyre që e kanë besuar.
Për të kuptuar nëse ky person ka një praktikë fikse të përsëritur tek çdo hallexhi, dërgojmë atje një tjetër bashkëpunëtore bashkë me vjehrrin e saj, i cili në fakt është kameramani ynë. Vajza ka probleme bashkëshortore, sepse burri është në emigrim dhe raporti në çift ka pësuar krisje. Një histori e zakonshme, tek shumë çifte që përballen me distancën dhe mungesën e komunikimit.
Kjo i mjafton pseudo-hoxhës për të thënë me bindje se vajza është e pushtuar nga xhindet, dhe me rukjet që ai po bën, tenton ta bindë se gjithçka po ndryshon. Pavarësisht se bashkëpunëtorja jonë ka hyrë aty plot shëndet e pa asnjë shqetësim apo mërzi. Fakti që nuk ka një tarifë për shërbimet që bën, nuk do të thotë se nuk përfiton, por përtej diskutimit financiar, problemi i madh me këtë individ, është shpresa e rreme që iu jep personave me probleme të shëndetit mendor, të cilët në tentativë për heqjen e xhindeve, humbin kohë me një person të tillë dhe nuk ndjekin kura të rekomanduara nga mjekët specialistë.
Këtë na e sqaron më së miri kjo shkresë e Komunitetit Musliman Shqiptar, sipas të cilës z. Dritan Beqiri nuk është pjesë e stafit të këtij komuniteti, nuk ka qenë dhe nuk është i regjistruar apo i njohur nga institucioni i tyre si hoxhë/imam. Ata shprehen se nuk disponojnë informacion mbi shkollimin e tij fetar, pasi ai nuk është pjesë e organikës së KMSH. Ai nuk ka autorizim nga KMSH për të kryer rituale fetare nëpër xhami, si edhe nuk ka licencë të lëshuar nga ky institucion për ushtrimin e shërbimeve fetare.
Pas kësaj përgjigjeje është momenti ynë që të shkojmë të ballafaqohemi me këtë person në lidhje me ritet e tij manipuluese ndaj njerëzve./piranjat.al
Të gjitha të drejtat e këtij materiali janë pronë ekskluzive dhe e patjetërsueshme e Piranjat.al sipas ligjit Nr. 35/2016 “Për të drejtën e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi pa autorizimin e Piranjat.al në të kundërt çdo shkelës do të mbajë përgjegjësi sipas nenit 179 të Ligjit 35/2016
