Bulevardi “Dëshmorët e Kombit” është mbushur me protestues që i janë bashkuar tubimit kundër projektit për n...
KOSOVA
Kurti: Jemi të vendosur t’i shmangim zgjedhjet e reja, nuk janë zgjidhje
PiranjatPërditësimi i fundit 6 Prill 2026, 14:03
Kryeministri i Kosovës, Albin Kurti njëherësh edhe kreu i Lëvizjes Vetëvendosja ka zhvilluar një takim për dy orë me kreun e Lidhjes Demokratike të Kosovës, Lumir Abdixhiku, ku kanë diskutuar për zgjedhjen e Presidentit të ri.
Në një prononcim për mediat pas përfundimit të takimit, Kurti u shpreh se është i vendosur që t’i shmangë zgjedhjet e reja pasi nuk janë zgjidhje për çështjen e presidentit.
“Çështja kryesore që u diskutua, por jo edhe e vetmja, ishte fakti që na kanë mbetur edhe tri javë deri te zgjedhja e presidentit dhe për këtë duhet t’i maksimizojmë përpjekjet.
Takimi shkoi në një atmosferë konstruktive dhe dashamirëse. Jemi të përcaktuar që t’i shmangim zgjedhjet e reja sepse nuk do të ishin zgjidhje për numrin prej 80 deputetësh.
Me fjalë të tjera është vështirë që ta paramendojmë një fushatë zgjedhore ku ne i risjellim platformat dhe programet tona me po të njëjtat zotime, të kërkojmë votën e qytetarëve për një rezultat që e dimë se nuk mund të jetë shumë ndryshe. Është sfidë tejet gjigante ajo që një parti t’i ketë 80 deputetë dhe të mund ta zgjedhë presidentin”, ka thënë ai.
Kurti u shpreh optimist se me takime të tilla do të mund të arrijnë marrëveshje politike, por theksoi se “nuk mund ta kemi sot”.
“Veçse atmosfera konstruktive në njërën anë dhe dashamirësia që t’i shmangim zgjedhjet më bëjnë optimist për këto tri javët e mbetura që uroj të mos i shfrytëzojmë deri në orën e fundit. Vazhdoj ta kem qëndrimin e njëjtë që nëse kemi një emër të përveçëm dhe po synojmë të jenë vetëm 80 vetë në sallë, ky do të ishte rrezik tepër i madh. Nuk është caku ynë për të ecur përpara, nevojiten të paktën 84-85 deputetë”, ka deklaruar ai.
