Është hequr gardhi metalik që ishte vendosur para Kuvendit të Shqipërisë si barrikadë për të penguar protestë...
KOSOVA
Ursula von der Leyen mbyll takimin në Prishtinë: Kosova duhet të ulë tensionet dhe të ndërtojë institucione të forta
PiranjatPërditësimi i fundit 15 Tetor 2025, 15:28
Gjatë vizitës së saj zyrtare në Prishtinë, Presidentja e Komisionit Evropian, Ursula von der Leyen, bëri thirrje për uljen e tensioneve në Kosovë dhe theksoi rëndësinë e ndërtimit të institucioneve të qëndrueshme si kusht i domosdoshëm për integrimin evropian.
Në një postim në platformën “X”, Von der Leyen u shpreh se Bashkimi Evropian mbetet i përkushtuar ndaj perspektivës evropiane të gjashtë vendeve të Ballkanit Perëndimor. Megjithatë, ajo theksoi se Kosova duhet të përmbushë detyrimet e saj për të përfituar nga Plani i Rritjes për rajonin.
“Ne mbetemi të përkushtuar ndaj një të ardhmeje ku të gjashtë partnerët e Ballkanit Perëndimor janë pjesë e Unionit tonë. Për këtë, është e rëndësishme që Kosova të vazhdojë të ndërtojë institucione të forta dhe të ulë tensionet në vend. Gjithashtu, Kosova duhet të finalizojë hapat e nevojshëm për të përfituar nga Plani i Rritjes,” shkroi ajo.
Pas qëndrimit në Prishtinë, Von der Leyen udhëtoi drejt Shkupit, ku po përmbyll turin e saj në Ballkanin Perëndimor, që ka për synim nxitjen e reformave dhe përshpejtimin e proceseve të integrimit në Bashkimin Evropian.
