Një aksident rrugor është regjistruar paraditen e kësaj të enjte (4 qershor 2026) në Tiranë, pranë Fabrikës s&eum...
LIFESTYLE
Rishikimi i vlerësimit vjetor të performancës
PiranjatPërditësimi i fundit 5 Tetor 2025, 08:13
Çfarë do të ndodhte sikur rolet të përmbyseshin?
(Ky është një tekst satirik i botuar nga The Economist, ku “Annual Performance Review” personifikohet si një punonjëse e quajtur Ann, për të ironizuar dobësitë, formalitetin dhe shpesh kotësinë e procesit tradicional të vlerësimit të performancës në kompani.)
Emri: Vlerësimi Vjetor i Performancës (shkurt Ann)
Departamenti: Të gjithë
Periudha e rishikimit: 2024-25
Përmbledhje: Ann është pjesë e kompanisë që nga viti 1973. Qëllimi i saj kryesor është të rishikojë performancën e të gjithë të tjerëve në organizatë dhe mund të thuhet me kënaqësi se ajo e ka arritur këtë rezultat për vitin e 51-të me radhë. Ajo është bërë pjesë e “mobilimit”, edhe pse askush nuk e pëlqen dhe as vetë nuk është shumë e lumtur me punën e saj.
Vlerësimi i menaxherit: Për t’ia njohur meritën, Ann përsëri siguroi që çdo punonjës i kompanisë të kishte të paktën një bisedë formale me menaxherin e tij për performancën, nivelin e kënaqësisë dhe objektivat. Ann ofroi një takim ku të dyja palët mund të ngrinin çështje të rëndësishme.
Ajo mblodhi dhe paraqiti informacion që lidhej drejtpërdrejt me vendimet për pagat, ngritjet në detyrë dhe, herë pas here, për gjëra më të pakëndshme.
Ne nuk kemi vendosur asnjë tregues për të përcaktuar nëse Ann e bën mirë punën e saj ose nëse shton ndonjë vlerë reale për organizatën. Por ekziston shumë hapësirë për përmirësim.
Ann kaloi pjesën më të madhe të vitit duke mos bërë absolutisht asgjë. Si zakonisht, njerëzit e harruan fare ekzistencën e saj derisa ajo, papritur, nisi sërish të kërkonte takime.
Nuk jemi të sigurt çfarë ka bërë gjatë asaj periudhe; ajo nuk mund të japë një përgjigje të qartë.
Dhe kur punon, nuk është e qartë sa përpjekje bën në të vërtetë: gjatë tre dekadave të fundit ka përditësuar formularin e saj të vlerësimit të performancës vetëm një herë, dhe kjo ishte vetëm për të ndryshuar llojin e shkrimit.
Ata që kanë punuar me Ann u pyetën për të dhënë komente në mënyrë anonime rreth saj. Disa pyetën pse ajo vazhdonte të ishte pjesë e stafit (“Kompani si Netflix dhe Adobe kanë vendosur të heqin dorë nga vlerësimet e performancës, por Ann duket se ka punë për gjithë jetën”;
“Ajo më kujton tezen time Dorothy, gjithmonë duke bërë të njëjtat pyetje dhe duke injoruar përgjigjet e mia”).
Pothuajse të gjithë menduan se Ann mund të ishte më proaktive. Shumë komentuan se mënyra e saj është shumë formale dhe se është e vështirë të ndihesh i lirshëm pranë saj.
Disa punonjës thanë se sapo Ann hynte në dhomë, menaxherët fillonin të thoshin gjëra që nuk i kishin dëgjuar kurrë më parë.
Duke parë anën pozitive, disa persona që nuk kishin asnjë kontakt me menaxherët e tyre ishin të lumtur që Ann u kujtoi shefave për ekzistencën e tyre (“Ai më pyeti nëse isha i sigurt që isha në dhomën e duhur, por sapo përmenda emrin e Ann, u bë pak më miqësor”).
Edhe punonjësit që kanë kontakt të shpeshtë me menaxherët e tyre e vlerësuan Ann për dhënien e mundësisë për të dokumentuar performancën e tyre dhe për të diskutuar ambiciet e karrierës.
Shumë shefa gjithashtu mendonin se ajo kryente një rol të dobishëm (“Ann ndihmon në vendosjen e objektivave të prekshëm për ekipin tim”; “Pa Ann, nuk do të kisha kurrë mundësi të heq qafe disa nga këta punonjës të padobishëm”).
Vlerësimi i punonjëses: Do të doja ta shfrytëzoja këtë mundësi për të përsëritur të gjitha gjërat që thashë në vlerësimin tim të fundit. Më pëlqen kompania dhe jam e lumtur që punonjësit nuk krahasohen me njëri-tjetrin. Megjithatë, nuk më pëlqen të mos jem e vlerësuar nga të gjithë.
Unë i përmbush të gjitha detyrat që më ngarkohen sa më mirë që mundem. Mund të mos jem personi më argëtues jashtë pune, por shumë më kanë thënë se duan seriozitet dhe formalitet kur bëhet fjalë për vendime mbi pagat dhe ngritjet në detyrë.”
Shumë nga kritikat që marr janë të padrejta. Nëse njerëzit habiten nga ajo që u thonë menaxherët e tyre, kanë të drejtë të zemërohen por nuk duhet të më fajësojnë mua.
Nuk është detyra ime të jap reagime dhe vlerësime rregullisht. Në fakt, do të doja të bëja më shumë gjatë vitit. Kam propozuar të shtoj orët e mia të punës dhe të bëhem një vlerësim tremujor i performancës, por askush nuk është i interesuar për këtë ide.
Madje shumë shefa këmbëngulin ta bëjnë të gjithë procesin e vlerësimit me mua brenda një jave; shumë prej tyre thjesht kopjojnë vërejtjet dhe komentet për të kursyer kohë.
Përmbledhja e menaxherit: Kam edhe rishikime të tjera për të bërë tani: në fakt, po më pret programi i orientimit. Do t’iu rikthehem të gjitha këtyre pikave me Ann në një moment tjetër, dhe padyshim pas një viti. Ndërkohë, ajo thjesht duhet të vazhdojë punën si më parë./Monitor
