Kryetari i Grupit Parlamentar të PD-së, Gazment Bardhi, iu përgjigj sot (5 qershor) kryeministrit Edi Rama për deklaratat që bër...
POLITIKE
'BE investon 11 milionë euro'/ Bashkia Mirditë pjesë e programit, Melyshi: Mbështetje për zhvillimin lokal
PiranjatPërditësimi i fundit 13 Maj 2026, 09:37
Mirdita është përfshirë në fazën e dytë të programit të Bashkimit Evropian “BE për Bashkitë” (EU4Municipalities), një nismë me vlerë totale 11 milionë euro që synon forcimin e qeverisjes vendore dhe përmirësimin e shërbimeve publike në Shqipëri.
Programi fokusohet në zhvillimin ekonomik lokal dhe përafrimin e bashkive me standardet e Bashkimit Evropian, duke synuar përmirësimin e administrimit vendor dhe rritjen e kapaciteteve institucionale.
Në kuadër të Javës së Evropës 2026, në Bashkinë Mirditë u zhvillua aktiviteti rajonal për prezantimin e kësaj faze të re të programit, ku morën pjesë përfaqësues të Delegacionit të Bashkimit Evropian në Shqipëri, institucione qendrore dhe vendore, partnerë ndërkombëtarë, organizata të shoqërisë civile si dhe qytetarë.
Kryetari i Bashkisë Mirditë, Albert Melyshi, e cilësoi Javën e Evropës si një moment të rëndësishëm reflektimi mbi rrugëtimin evropian të Shqipërisë dhe partneritetin me Bashkimin Evropian. Ai theksoi se mbështetja e BE-së ka sjellë përmirësime në infrastrukturë, shërbime publike dhe në përafrimin e standardeve vendore me ato evropiane.
Nga ana tjetër, përfaqësuesja e Delegacionit të BE-së në Shqipëri, Ritva Heikkinen, prezantoi fazën e re të programit, duke theksuar se nga totali prej 11 milionë eurosh, 6.5 milionë euro do të shpërndahen në formë grantesh për bashkitë shqiptare. Sipas saj, programi synon rritjen e cilësisë së shërbimeve publike, forcimin e transparencës dhe nxitjen e zhvillimit ekonomik lokal.
Ajo u shpreh se ndryshimi real i mbështetjes së Bashkimit Evropian duhet të ndihet në terren, përmes investimeve konkrete dhe përmirësimit të jetës së qytetarëve, duke theksuar se rruga e integrimit europian fillon nga bashkitë dhe komunitetet lokale.
Gjatë aktivitetit u evidentuan edhe sfidat kryesore të Bashkisë Mirditë, përfshirë emigracionin, zhvillimin ekonomik, infrastrukturën dhe mundësitë për të rinjtë, duke nënvizuar nevojën për bashkëpunim më të ngushtë mes pushtetit vendor, institucioneve qendrore dhe partnerëve ndërkombëtarë.
Në përmbyllje u vlerësua kontributi shumëvjeçar i partnerëve ndërkombëtarë në zhvillimin e zonës, përfshirë Austrinë, Japoninë, Italinë, UNDP-në dhe organizata të tjera, si dhe angazhimi i tyre në projekte sociale dhe zhvillimore në Mirditë.
