Mbahet sot në orën 18:00 protesta e pestë e qytetarëve kundër projektit të ndërtimit të resortit në zonën e ...
POLITIKE
"Beteja e 11 majit është vendimtare për fatin e kombit!" Berisha: Elon Musk-un shqiptar mund ta gjejmë edhe në diasporë!
M.B.Përditësimi i fundit 23 Mars 2025, 17:52
NAPOLI- Kreu i Partisë Demokratike Sali Berisha tha sot nga një takim me shqiptarët në Napoli se "të pastrosh shtëpinë" do të thotë të bësh një audit të përgjithshëm. Duke krahasuar idenë e tij me atë që ndodhi në SHBA, Berisha tha se një lloj Elon Muski shqiptar do gjendet. Ai shtoi se ky i fundit do të jetë nga diaspora, apo nga Shqipëria, por mbi të gjitha sipas tij, pa audit të përgjithshëm nuk shkohet përpara.
Berisha tha se Shqipëria do jetë epiqendër e teknologjive më të larta dhe një superfuqi energjetike në rajon. Ai tha se nga jugu në veri, shqiptarët do vendosin panelet fotovoltaike dhe ata do marrin energji falas nga ato panele.
Pjesë nga fjala e Berishës:
Të pastrosh shtëpinë do të thotë të bësh një audit të përgjithshëm, një lloj Elon Muski shqiptar do gjendet. Do jetë nga diaspora, do jetë nga Shqipëria, do jetë nga miqtë tanë, pa audit të përgjithshëm nuk shkohet përpara. Pa gjetur qindra e qindra milionë të vjedhura shqiptarëve, Shqipëria nuk ndërtohet dot mbi mëkatin. Shqipëria do ndërtohet jo mbi vesin, do ndërtohet mbi virtytin dhe unë u garantoj se do e realizojmë atë. Të dashur miq, Shqipëria Madhështore do të jetë Shqipëria që ka kapur trenin e revolucionit teknologjik. Shoqëria ka pasur revolucione industriale, teknologjike periodikisht. Vendet që kanë humbur trenin, kanë mbetur shumë mbrapa.
Kësaj herë, Shqipëria nuk do e humbasë më trenin. Shqipëria do jetë epiqendër e teknologjive më të larta. Shqipëria do jetë një superfuqi energjetike në rajon. Nuk ka vend më të pasur në 28 mijë kilometra katrorë në ujë, në erë, në diell, në gaz. Ndaj dhe zotimi ynë është shumëfishimi i prodhimit të energjisë nga dielli, dhuratë e Zotit. Nga jugu në veri, shqiptarët do vendosin panelet fotovoltaike dhe ata do marrin energji falas nga ato panele. Këtu nga jugu i Italisë është një kompani që studioi Pukën dhe gjeti një kapacitet eolik, ere, prej 3200 megavatë vetëm rrethi i Pukës. Prapë do ta ftoj, prapë do vijë, prapë do vazhdojmë betejën tonë. Shqipëria ka njërin prej gazsjellësve më të mëdhenj në Europë, kështu që nga ky prodhim energjie do fitojë në radhë të parë qytetarët shqiptarë.
Biznesi shqiptar do e marrë energjinë me çmimin më të lirë në Europë, 6 lekë kilovati. Qytetarët do paguajnë 7 lekë kilovati. Kurse ata me panele fotovoltaike do paguajnë vetëm tre vite, pasi do e marrin falas. Pra, a nuk shkon Shqipëria drejt një madhështie që nuk e kemi përfytyruar? A nuk janë këto reale? Që të gjitha. Këto premtime kërkojnë vetëm një gjë, kërkojnë që të ndajmë epokat, të ndajmë historinë: me 11 maj të arkivojmë narkodiktaturën e Edi Ramës. Ndaj dhe në këto 50 ditë, beteja nuk zhvillohet vetëm në qytetet dhe fshatrat e Shqipërisë, beteja zhvillohet në qytetet dhe fshatrat kudo që ndodhen shqiptarët, në Napoli, Itali, në botë, kudo. Dhe kjo betejë është vendimtare për fatin e kombit, për fatin e Shqipërisë. Kjo betejë ndan ditën me natën.
