Kryeministri Edi Rama ka vijuar sulmet ndaj protestuesve që prej javësh janë mbledhur në Tiranë kundër qeverisë së tij...
POLITIKE
Boçi: Rama është në panik dhe në përplasje të hapur me SPAK
PiranjatPërditësimi i fundit 16 Dhjetor 2025, 17:30
Deputeti i Partisë Demokratike, Luçiano Boçi, në një intervistë për Syri TV, ka deklaruar se qëndrimet dhe sulmet e fundit të kryeministrit Edi Rama ndaj SPAK-ut tregojnë qartë një përpjekje për të rezistuar dhe bllokuar veprimet e drejtësisë.
Sipas Boçit, Rama po shfrytëzon shumicën parlamentare dhe procedurat institucionale për të penguar kërkesën e SPAK-ut për heqjen e imunitetit dhe arrestimin e zëvendëskryeministres Belinda Balluku, ndërsa kjo sjellje buron nga paniku, pasi siç thekson ai, të gjitha aferat e mëdha korruptive përfundojnë tek përgjegjësia direkte e kryeministrit.
Luçiano Boçi: Unë mendoj që po. Në atë kontekstin e thënë, shprehja e Ramës për të reflektuar një qëndrim ndryshe ndaj vendimeve të SPAK-ut, të çon tek mendimi që ai do, do rezistojë, do ketë një rezistencë nga ana e tij, në ato nivele që diskutohet edhe kërkesa e SPAK-ut, e cila ka mbërritur në Kuvend. Kuvendi ia dërgon komisionit të mandateve, i cili mblidhet ditën e premte, me sa kam marrë një informacion nga parlamenti, dhe që vendos më pas, duke dëgjuar edhe të akuzuarën, vendos dhe harton një raport për dy javë, pas së cilit raport i kërkohet pastaj seancës të mblidhet apo jo.
Ja nis pastaj seancës, ku votohet me mënyrë, me votim të hapur heqja e imunitetit. Por ka dy momente. Mund ta bllokojë nëpërmjet komisionit, sepse në komisionin e mandateve Rama ka shumicën, përderisa kemi një paralajmërim të tillë. Mund ta bllokojë në seancë me votim të hapur. Mund ta bllokojë dhe me procedurë. Mundet që Kuvendi të mos japë një përgjigje definitive ose komisioni, përgjatë një periudhe tre mujore dhe pas kësaj duket sikur nuk e pranon kërkesën e SPAK-ut. Pra janë disa variante që Rama mund t'i përdorë për të bllokuar kërkesën e SPAK-ut për arrestimin e zëvendëskryeministres, zonjës Balluku. Ndërkohë që mos harrojmë që Partia Socialiste ka sanksionuar me demek, sepse pritet ta shikojmë, një qëndrim të saj në momentin kur është kërkuar heqja e imunitetit për zotin Berisha. Ka pasur një deklaratë të zotit Çuçi, atëherë kryetar i grupit parlamentar, që publikisht ka thënë që Partia Socialiste është e gatshme të heqë imunitetin e çdo lloj deputeti, pavarësisht krahut, madje ka ironizuar, ka thënë dhe pa krah të jetë, vetëm e vetëm që të respektohet kërkesa e drejtësisë, e drejtësisë së re. Dhe tani do shohim nëse do e zbatojnë këtë standart të deklaruar në rastin e zëvendëskryeministres. Unë shqetësuese, në fakt nuk shoh këtë parashikim.
Çfarëdo lloj qëndrimi të mbajë Rama në raport me arrestimin e zonjës Balluku, tashmë rruga është formatuar dhe përfundimi ka nisur atë rrugëtimin e tij për të dalë në një dënim apo një, në një qëndrim të sistemit të drejtësisë. Shqetësimi kryesor është mënyra se si Rama e kundërshton, se si i kundërvihet SPAK-ut dhe se si e ka sulmuar përgjatë këtyre ditëve, sepse edhe deklaratat e djeshme që lidheshin me patllaket e BKH-së, nuk ishin sulm ndaj BKH-së, sepse dihet që BKH-ja është në suazën e SPAK-ut.
Ishte një sulm i hapur ndaj SPAK-ut dhe mendoj që Rama ndoshta ka pasur indicie që sot SPAK-u do kërkonte arrestimin e zonjës Balluku dhe ka dashur që t'i paraprijë këtij qëndrimi, të çojë presionin e tij në maksimum me qëllim që SPAK-u të mos kalonte në këtë hap. Dhe në kuadër të këtyre qëndrimeve, kulmi arrin sot dhe duket që Rama ka modifikuar dhe ka hequr atë maskën që ka kohë që në fakt e ka gërvishur, ndërsa sot e ka hequr fare dhe ka dalë totalisht kundër drejtësisë, ka dalë kundër SPAK-ut dhe kërkon të rezistojë.
Unë mendoj që kjo rezistencë nuk vjen thjesht nga dëshira për të mbrojtur varsin e tij apo bashkëpunëtoren e tij më të ngushtë, por vjen nga paniku. Rama është në panik dhe ai e di shumë mirë që të gjitha rrugët të çojnë në Romë. Të gjitha dosjet të çojnë tek Rama. Edhe inceneratorët, edhe ato koncesionet, sterilizimi apo aferat e tjera, të çojnë të gjitha tek Rama, sepse ky është personazhi kryesor, ky është përgjegjësi kryesor në fakt, përtej të qenurit personazh, i cili ka mbështetur, i cili ka stimuluar, i cili madje, themi, ka financuar sepse ky është kryeministri dhe i cili sot duhet të mbajë përgjegjësinë e tij për të gjitha veprimet.
Qartazi, duke qenë në panik, ai kërkon të bllokojë çfarëdo lloj rreziku që mund të prekë atë, duke përfshirë edhe teatrin që bën për t'i treguar zonjës Balluku që ai po reziston, që ai po e mbron, me qëllim që të parandalojë edhe të kthyerën e Ballukut në një të penduar të drejtësisë, sepse gjasat janë, parashikimet janë, takimi i shtatë orësh që është bërë në kryeministri dëshmon që ka pasur një presion nga ana e zonjës Balluku për kryeministrin Rama.
