Reperi i njohur kosovar, Capital T, u ka bërë thirrje mediave në Kosovë që tu kushtojnë më shumë vëmendje zhvillime...
POLITIKE
Ekspertët: Kostoja e premtimeve elektorale llogaritet në dhjetëramiliardë euro
r.llPërditësimi i fundit 16 Prill 2025, 20:04
edi rama ne hapjen e fushates
TIRANË- Shqipëria është njohur për udhëheqës politikë të premtimeve të pamundura, por kësaj here duket se gjërat janë ekzagjeruar në një nivel krejt tjetër me premtime nga të gjitha palët për politika ekonomike e fiskale të shumta, ndërsa dy partitë kryesore përballen me një krizë kredibiliteti të shkaktuar jo aq shumë nga mosrealizimi i premtimeve elektorale të shkuara se sa nga skandalet e njëpasnjëshme korruptive.
Sipas një vlerësimi të qendrës Altax, një qendër studimore në Tiranë, premtimet e partive kryesore si Partia Socialiste dhe Partia Demokratike, apo partive të reja si Shqipëria Bëhet dhe Lëvizja Bashkë, kërkojnë disa dhjetëramiliardë euro që të mund të bëhen realitet përgjatë katër viteve të ardhshme.
Altax thotë në publikimin e saj “Indeksi i Fizibilitetit të Premtimeve Elektorale” se i ka gjurmuar deklaratat publike të politikanëve të ndryshëm dhe ka vlerësuar me ekspertët e saj koston potenciale të këtyre premtimeve, bazuar në të dhënat e njohura, si të dhëna demografike.
Vlerësimet e Partisë Socialiste për, fjala vjen, rritje pensionesh dhe rritje pagash, arsim e bujqësi, mundet të kushtojnë në total mes 33 dhe 35 miliardë eurove përgjatë katër viteve të ardhshme, ndërsa premtimet e aleancës “Shqipëria Madhështore” e drejtuar nga Sali Berisha dhe Ilir Meta, vlerësohet mes 22.5 dhe 29 miliardë euro përgjatë të njëjtës periudhë.
Vlerësimi i programit për Lëvizjen Bashkë është krahasimisht më pozitiv, me një kosto totale të realizimit të tij të vlerësuar mes 10 dhe 13 miliardë euro për katër vitet e ardhshme ose mes 2.5 dhe 3 miliardë euro në vit.
Vlerësimi i nevojave për zbatimin e programit të “Shqipëria Bëhet” është në masën 25 miliardë lekë për katër vitet e ardhshme.
Të gjitha premtimet, nga më të përmbajturat deri te më të ekzagjeruarat, bien në fakt ndesh me realitetin ekonomik të vendit, ku buxheti i shtetit është në masën 7.2 miliardë euro dhe premtimet e partive kryesore kërkojnë më shumë se sa kaq para vetëm për premtimet, pa marrë parasysh kostot aktuale buxhetore.
Për më shumë informacion mbi premtimet dhe fizibilitetin e tyre mund të klikoni: polifakt.al
