Reperi i njohur kosovar, Capital T, u ka bërë thirrje mediave në Kosovë që tu kushtojnë më shumë vëmendje zhvillime...
POLITIKE
Gjykata Kushtetuese zbardh vendimin për mbarimin e mandatit të anëtares Sonila Bejtja, dy gjyqtarë votuan kundër
PiranjatPërditësimi i fundit 24 Tetor 2025, 17:44
Gjykata Kushtetuese ka zbardhur vendimin e mbarimit të mandatit të gjyqtares, Sonila Bejtja, duke argumentuar se mandati i anëtarit zëvendësues, Sokol Berberi, ka mbaruar në datën 25.04.2016 në po atë datë ka filluar edhe mandati kushtetues që ushtron gjyqtarja Sonila Bejtja.
Megjithatë, kjo e fundit e ka nisur detyrën tre vite më vonë si e përzgjedhur nga Presidenti i Republikës.
Nga shtatë gjyqtarë, dy prej tyre kanë qenë kundër përkatësisht kryetarja Holta Zaçaj dhe anëtari i Kushtetueses, Gent Ibrahimi. Pas mbarimit të mandatit të zonjës Bejtja, tanimë Presidenti i Republikës, Bajram Begaj do të shpallë vakancën për anëtarin e ri si organ i emërtesës.
Anëtarët e kësaj gjykate nuk kanë qenë unanimë në vendimmarrje. Mendimi i pakicës që përfaqësohet nga kryetarja Holta Zaçaj dhe Genti Ibrahimi, argumenton se “kërkimi i Presidentit për deklarimin e mbarimit të mandatit të gjyqtares Sonila Bejtja është i pabazuar, ndaj duhej të ishte vendosur rrëzimi i tij”.
“Mandati në këtë rast nuk përkthehet thjesht si koha gjatë të cilës ushtrohet një detyrë e caktuar, pra si një detaj procedural, por ai lidhet drejtpërdrejt me garancitë dhe parimet kushtetuese, përfshirë ato të pavarësisë së Gjykatës dhe patundshmërisë në detyrë të gjyqtarit kushtetues,” thuhet ndër të tjera në argumentet e dy gjyqtarëve që kanë votuar kundër.
Sipas këtij argumentimi, garancia e kohëzgjatjes dhe paprekshmërisë së mandatit e mbron gjyqtarin nga ndikimet e forcave politike që mund të vijnë në pushtet.
