Rolando Maran duhet të ketë patur diçka tjetër në mendje, kur pranoi të ulej në pankinën e kombëtares së S...
POLITIKE
Mazhoranca refuzon kërkesat e PD për komisione hetimore
PiranjatPërditësimi i fundit 7 Prill 2026, 17:33
Mazhoranca socialiste rrëzoi të martën në Konferencën e Kryetarëve dy kërkesa të deputetëve të opozitës për ngritjen e komisioneve hetimore parlamentare për të vlerësuar shkeljet e pretenduara ligjore në tenderat e rrugëve dhe të teknologjisë së informacionit, sektorë që janë në hetim nga Prokuroria e Posaçme, SPAK.
Kërkesat e Partisë Demokratike parashikonin hetim të ligjshmërisë në tenderat e realizuar nga Autoriteti Rrugor Shqiptar duke marrë shkas nga dëmtimet në akset rrugore të sapondërtuara dhe hetim për të vlerësuar sigurinë kibernetike dhe mbrojtjes së të dhënave të qytetarëve, pas zbulimit nga SPAK të një afere korruptive në tenderat e Agjencisë Kombëtare të Shoqërisë së Informacionit, AKSHI.
Në rastin e AKSHI-it, SPAK goditi një grupi të dyshuar kriminal në krye të kësaj agjencie, dhe vendosi nën akuzë 8 persona për një seri veprash penale, mes të cilëve edhe drejtoreshën Mirlinda Karçanaj. Sipas hetimit, Ergys Agasi, një personazh kontrovers dhe biznesmeni Ermal Beqiraj krijuan një grup të strukturuar kriminal për manipulimin e tenderave të AKSHI-it, duke përdorur dhunë dhe pengmarrje.
Sipas PD-së, ngjarja ka ngritur shqetësime për cënim të Sigurisë Kombëtare, pasi kjo agjenci është një prej institucioneve më sensitive në vend dhe hetimi parlamentar kërkohet për të verifikuar aksesin në të dhënat kritike të operatorëve ekonomikë të kontraktuar nga kjo agjenci.
Socialistët i konsideruan kërkesat si të pambështetura në ligj dhe ndërhyrje në punët e drejtësisë.
Kryetari i grupit parlamentar socialist, Taulant Balla, tha pas mbledhjes se kërkesat për hetim parlamentar nuk duhet të “interferojnë në pushtetin gjyqësor” dhe se “kërkesa duhet të ketë një objekt të veçantë”.
Për çështjen e tenderave të rrugëve ai pretendoi se formulimi i kërkesave i ngjante një “ekspedite peshkimi”, duke mos veçuar një çështje konkrete për hetim, ndërsa për AKSHI-in Balla tha se “nuk duhet të ndërhyhet në kompetencat e gjyqësorit, kur këto hetime po kryhen nga pushteti gjyqësor”.
Ky është një argument i ripërsëritur nga PS për të refuzuar kërkesat për hetim parlamentar nga opozita.
Për kryetarin e grupit parlamentar demokrat, Gazment Bardhi, rrëzimi nga mazhoranca i çdo mjeti parlamentar që ka opozita në dorë për të kontrolluar qeverisjen është tregues i një ‘urrejtje politike’.
PD pretendon se hetimi parlamentar nuk e pengon hetimin penal, por nxjerr përgjegjësitë institucionale dhe problemet ligjore.
