Pas denoncimit të Arben Ahmetajt, mediat reagimet ishin të shumta. Por mbi të gjitha, në të njëjtën kohë që Arben A...
POLITIKE
“Nuk jam politikan, jam qytetar”, Florjan Binaj reagon pasi Berisha ofroi mbështetjen e PD si kandidat për kryebashkiak
PiranjatPërditësimi i fundit 6 Tetor 2025, 21:03
Aktori i njohur dhe aktivisti Florjan Binaj ka reaguar publikisht pas deklaratës së Partisë Demokratike, e cila bëri të ditur se do të mbështesë kandidaturën e tij për postin e kryetarit të Bashkisë së Tiranës, si kandidat i pavarur.
Në një mesazh drejtuar qytetarëve, Binaj falënderoi PD-në, si dhe partitë opozitare "Shqipëria Bëhet" dhe "Nisma Thurje", për mbështetjen e tyre.
Ai u shpreh i gatshëm të pranojë çdo mbështetje nga forcat opozitare, duke theksuar se kjo është një garë qytetare, jo politike.
“Unë nuk jam politikan, jam qytetar. Partia ime jeni JU!”, shkruan Binaj në reagimin e tij.
Aktori falënderoi gjithashtu qytetarët e Tiranës për mbështetjen dhe inkurajimin që ka marrë këto ditë, duke shtuar se deri më sot ka luftuar padrejtësitë me humor dhe art, ndërsa tani kërkon që kjo betejë të bëhet me votë.
“Kjo garë është për ju. Deri më sot kam luftuar padrejtësinë dhe të keqen me humorin dhe artin tim, sot ju ftoj ta luftojmë me votë,” shkruan ai.
Florjan Binaj është ndër emrat publikë më të angazhuar në kauza qytetare dhe protesta në vitet e fundit, dhe kandidatura e tij shihet si një përpjekje për të ofruar një alternativë jashtë politikës tradicionale në kryeqytet.
Reagimi i Binajt:
Falenderoj për mbështetjen që i dha kandidimit tim si kandidat i pavarur Partia Demokratike, Shqipëria Bëhet dhe Nisma Thurje.
Mbetem i hapur për çdo mbështetje që do të vijë nga forcat opozitare.
Dëshiroj mbi të gjitha të falenderoj me mijëra qytetarë të Tiranës, të cilët më kanë inkurajuar këto ditë.
Kjo garë është për ju!
Unë nuk jam politikan, jam qytetar dhe partia ime jeni JU!
Deri më sot kam luftuar padrejtësinë dhe të keqen me humorin dhe artin tim, sot ju ftoj ta luftojmë me votë.
Të dënojmë ata që na vodhën dhe bënë humor me ne! Ju ftoj të bëjmë bashkë mendjet dhe zemrat kundër pushtetit që po dhunon jetët dhe të ardhmen e fëmijëve tanë!
