Ka nisur protesta e pestë në mbrojtje të Zvërnecit, ku qytetarët kundërshtojnë projektin për ndërtimin e një r...
POLITIKE
Përballë Manastirliut për Bashkinë Tiranë? - Haçka: Jam i gatshëm, puna ime është për të luftuar qeverinë e Ramës
PiranjatPërditësimi i fundit 3 Tetor 2025, 15:10
Florian Haçka, një nga tre kandidatët e opozitës të propozuar për bashkinë e Tiranës në zgjedhjet e parakohshme lokale, ka shprehur se ndihej i nderuar për mundësinë që emri i tij ishte propozuar për këtë pozicion të rëndësishëm. Ai nënvizoi se ishte i gatshëm për t’u përballur me regjimin dhe për të udhëhequr qytetin, por vuri theksin se gjithçka do të vendosej pas një diskutimi të thellë dhe një vendimi përfundimtar.
Në një intervistë televizive, Haçka tha se nuk dinte saktësisht se kush e kishte propozuar, por theksoi se kandidatura e tij ishte mbështetur nga aleatë të ndryshëm, përfshirë edhe ata jashtë PD-së. Ai e konsideroi një vlerësim për punën e Diasporës dhe shprehu bindjen se Tirana ka nevojë për një figurë të fortë dhe përbashkuese. "Tirana ka nevojë për një figurë që bashkon shqiptarët dhe thyen mitin se ata nuk mund të punojnë bashkë," tha Haçka, duke shtuar se kjo është një betejë për të sjellë ndryshimin dhe një sfidë kundër qeverisjes aktuale.
Më tej ai vuri theksin te rëndësia e votës së diasporës, duke u shprehur se "Jemi të gjithë të bindur se diaspora ka shumë rëndësi dhe është e domosdoshme që të kemi një kandidaturë që do t’i mbështesë ata," shtoi ai.
Për më tepër, Haçka tregoi se kishte marrë frymëzim nga daja i tij, Halim Kosova, si dhe për mbështetje të diasporës shqiptare në Gjermani. "Daja im ka marrë mijëra vota, jo vetëm për partinë, por si një figurë që bashkon, dhe kjo është e rëndësishme," theksoi Haçka.
Duke komentuar akuzat e Adriana Kalasë, e cila e quajti të mbështetur nga George Soros dhe të infiltruar brenda PD-së, Haçka refuzoi t’u përgjigjej sulmeve. "Unë e respektoj zonjën Kalaja, por sugjeroj që energjitë e saj të kthehen kundër regjimit dhe jo ndaj vetes. Puna ime është për të luftuar qeverinë e Ramës," tha ai.
Në lidhje me akuzat për shtetësinë, Haçka e sqaroi se ka shtetësi shqiptare dhe është aktiv si pjesë e diasporës, duke vizituar shpesh Shqipërinë. Ai po ashtu tregoi se nuk ka pasur kontakte direkte me kreun e PD-së, Sali Berisha, por ka biseduar me përfaqësues të tjerë të opozitës, të cilët e kanë propozur për kandidat.
Në fund, Haçka shpalosi edhe disa nga projektet dhe planet kryesore që ka për Tiranën, duke theksuar se nëse do të shpallej kandidat zyrtar, synimi i tij do të ishte të transformonte qytetin dhe të adresonte problematikat që e prekin atë. "Nëse qytetarët më japin besimin e tyre, unë jam i gatshëm për të ndihmuar Tiranën të bëhet një qytet më të mirë për të gjithë," përfundoi ai.
