Një qytetare që mori pjesë në protestë ka reaguar ashpër ndaj situatës në vend, duke ngritur shqetësime për ...
POLITIKE
'Premtime për propagandë'/ Pollo: Shqipëria pa asnjë shans real për anëtarësim në BE deri në 2030
PiranjatPërditësimi i fundit 27 Dhjetor 2025, 12:19
Ish-deputeti demokrat Genc Pollo ka shprehur skepticizëm të fortë ndaj premtimeve të qeverisë Rama dhe sinjaleve optimiste nga zyrtarë në Bruksel për mbylljen e kapitujve të negociatave deri në vitin 2027 apo anëtarësimin e Shqipërisë në Bashkimin Europian në vitin 2030.
Pollo i cilësoi këto afate si të parealizueshme dhe të përdorura kryesisht për qëllime propagandistike. Sipas tij, realiteti politik dhe institucional në vend nuk përputhet me standardet që kërkon BE-ja.
“Do të doja të isha i gabuar, por objektivisht këto janë flluska. Janë premtime që keqpërdoren për propagandë”, u shpreh Pollo.
Ai theksoi se një sërë kapitujsh negociues kërkojnë investime konkrete dhe reforma të thella, të cilat sipas tij qeveria nuk ka vullnet t’i realizojë. Si shembull, Pollo përmendi kapitullin e sigurisë ushqimore, që kërkon investime serioze në laboratorë dhe infrastrukturë teknike.
Por problemi, sipas tij, shkon përtej aspekteve teknike. Pollo deklaroi se Shqipëria po largohet nga modeli i një demokracie funksionale dhe po rrëshqet drejt një sistemi autokratik, ku pushteti është i përqendruar dhe përdoret për përfitime klienteliste.
“Por, ndërkohë që Shqipëria ishte një demokraci funksionale, me një shtet ligjor imperfekt, por gjithsesi funksional, kthehet në një autokraci ku gjithë pushteti është në një dorë dhe përdoret për të plaçkitur miliona, dhe ku të gjitha të dhënat e shtetasve kontrollohen në një agjenci të vetme që është nën kontrollin e bandave, atëherë duket një luks i jashtëzakonshëm të flasësh për sigurinë ushqimore”, tha ai.
Sipas ish-deputetit, pa rikthimin e shtetit ligjor, ndarjes së pushteteve dhe reformave reale, integrimi europian mbetet më shumë një slogan politik sesa një objektiv i arritshëm.
