Ambasadori i Gjermanisë në Shqipëri, Karl Bergner i kujton kryeministrit Rama se në rrugën për integrimin në B...
POLITIKE
Protesa e opozitës/ Hoti: Protestuesit janë shpresa e demokracisë, Shqipëria është kthyer në 'narkoregjim'
PiranjatPërditësimi i fundit 22 Dhjetor 2025, 18:58
Në protestën kombëtare të opozitës, Elda Hoti , deputete e Partisë Demokratike falënderoi qytetarët si “shpresë për demokracinë”. Ajo i përshkroi qytetarët si mbrojtës të dinjitetit të Shqipërisë kundër keqqeverisjes dhe krimit të organizuar. Hoti kritikoi largimin masiv të të rinjve dhe rënien e popullsisë për shkak të keqqeverisjes.
Deputetja denoncoi varfërinë e qytetarëve, pensionistëve dhe çiftet e reja, ndërsa zyrtarët jetojnë në luks. Ajo përmendi lidhjet e pushtetit me krimin e organizuar dhe abuzimin me fondet publike. Hoti theksoi se vuajtjet e qytetarëve flasin më shumë se fjalët e saj.
Hoti u shpreh se Shqipëria është kthyer në një “narkoregjim” dhe shteti nuk mbron qytetarët. Më tej, ajo u zotua se opozita dhe qytetarët nuk do të lejojnë shkatërrimin e vendit nën emrin e zhvillimit.
Hoti: Dua ta nis këtë fjalë me një përulje të thellë për secilin prej jush. Ju jeni shpresa që ky vend mund të ketë demokraci. Ju jeni mbrojtësit e saj. Ju jeni shpresa që Shqipëria së bashku mund t'i rikthejmë dinjitetin e nëpërkëmbur nga kusarët e pushtetit dhe krimit të organizuar. Ju sot jeni shpresa që Shqipëria nuk do të zhbëhet. Ju jeni fuqia e vetme e misionit tonë.
Një falenderim të veçantë për ju qëndrestarë që nuk jeni dorëzuar asnjë ditë, edhe pse pushteti ju ka përndjekur, ju ka kërcënuar dhe është munduar t'ju blejë. Të flasësh sot nga ky podium nuk është e lehtë, sepse më shumë se fjalët tona, flasin vuajtjet tuaja, flasin mundimet tuaja, flet e përditshmja juaj. Të flasësh për Shqipërinë e kthyer në narkoregjim, nuk është e lehtë.
Të flasësh për një popull që është tkurrur me më pak se 2 milion banorë nga keqqeverisja dhe babëzia e rilindjes, nuk është e lehtë. Të flasësh për të rinj që rrezikojnë jetën në gomone duke kërkuar një të ardhme më të sigurt, nuk është aspak e lehtë. Ne flasim për zhvillim, po çfarë zhvillimi është ky, kur pensionistët numërojnë qindarkat? Çfarë zhvillimi është kur prindërit tanë detyrohen të zgjedhin midis një ilaçi cilësor dhe një ilaçi të dorës së tretë, sepse nuk ju mjaftojnë paratë?
Çfarë zhvillimi është kur çiftet e reja llogarisin dekada punë kursime për një shtëpi, ndërsa e pandehura Belinda Balluku ka shtëpi që e përdor vetëm për të mbajtur çelësat e 300 apartamenteve të grabitura nga taksat tuaja. Ndërkohë që qytetarët mezi mbyllin muajin, ata atje jetojnë në luks të shfrenuar, me 3 milionë euro verë, koordinatori i krimit të organizuar Ergys Agasi.
Shishet e verës së Ramës në vilën e Gysit është shenja se kur krimi bashkohet me shtetin, qytetari ka marrë fund. A e mbani mend miqtë e mi? 30.000 euro një shishe verë pinte kryeministri. Sa pensioni i 30 pensionistëve në një vit. Bodrumi me verë i Gysit, sa kostoja e pajisjeve që i duhen onkologjikut, që shqiptarët të mos vdesin në korridoret e spitaleve. Po për hallet personale të Belindës dhe Edit, a duhet ne të braktisim shtëpitë tona, familjet tona, vendin tonë? Sigurisht që jo. Nuk do të pranojmë që kjo bandë hajdutësh të na vjedhë çdo ditë, të na shkatërrojë Shqipërinë dhe të na thotë se kjo është zhvillim.
