Revolta kundër ndërtimeve në Zvërnec nuk është kufizuar vetëm brenda Shqipërisë. Dje dhe sot, shqiptarë që...
POLITIKE
“Qeveria ka bërë reforma vetëm në letër”- Jorida Tabaku: Vetëm 15% e bizneseve shqiptare gati për BE-në
PiranjatPërditësimi i fundit 25 Maj 2026, 14:11
Ndërsa qeveria po përgatitet të nisë fazën tjetër të negociatave me Bashkimin Europian pas kalimit të IBAR-it, deputetja e Partisë Demokratike, Jorida Tabaku, ka ngritur shqetësimin për mungesën e përgatitjes reale të ekonomisë shqiptare dhe sidomos të bizneseve për standardet europiane.
Në një video të publikuar në rrjetet sociale, Tabaku thekson se procesi i integrimit nuk mund të reduktohet në miratim ligjesh në letër, ndërkohë që bizneset shqiptare mbeten të papërgatitura për kostot dhe standardet që kërkon tregu europian.
Sipas saj, vetë shoqatat e biznesit pranojnë se vetëm 15% e bizneseve, kryesisht ato prodhuese, janë gati për procesin e integrimit, ndërsa shumica dërrmuese nuk përballojnë dot kostot e përafrimit me standardet e BE-së.
“Integrimi duhet të kishte qenë prej kohësh kryefjalë edhe për biznesin. Duhej bërë analizë e kostove dhe përfitimeve, konsultime reale me sipërmarrjen dhe përgatitje konkrete për mënyrën se si legjislacioni europian do të ndikojë ekonominë shqiptare,” shprehet Tabaku.
Deputetja demokrate ngre pyetje mbi aftësinë e bizneseve për të përballuar investimet e reja, teknologjinë dhe mungesën e fuqisë së kualifikuar punëtore, duke paralajmëruar se barra e reformave po u transferohet qytetarëve dhe sipërmarrjes, ndërkohë që qeveria është fokusuar më shumë tek propaganda sesa tek përgatitja reale e vendit.
Ajo lidh procesin e integrimit edhe me problemet ekonomike dhe sociale të vendit, nga pagat dhe pensionet tek boshllëqet sociale, duke theksuar se Shqipëria vazhdon të mbetet ndër vendet më problematike në rajon për standardin e jetesës.
“Integrimi nuk është vetëm hapje kapitujsh apo miratim ligjesh. Është ndërtim standardesh dhe institucionesh funksionale në praktikë,” deklaron Tabaku.
Fjala e Tabakut
Duke uruar që ta keni nisur mbarë javën, doja që diskutimin për këtë javë ta nisja me çështjen e integrimit europian.
Është një çështje që ka qenë kryefjalë e ditës, e javëve dhe e muajve të fundit. Fatkeqësisht, jo gjithmonë për arsyet e duhura. Por sot dua të ndalem tek një element shumë i rëndësishëm: gadishmëria e biznesit shqiptar për procesin e integrimit.
Vetë shoqatat e biznesit deklarojnë se vetëm 15% e bizneseve, kryesisht ato prodhuese, janë gati për procesin e integrimit, ndërkohë që 98% e tyre nuk i përballojnë dot kostot.
Do të thotë që integrimi europian duhet të kishte qenë prej kohësh kryefjalë edhe për biznesin shqiptar. Duhej të ishte bërë me kohë një analizë reale e kostove dhe përfitimeve. Bizneset duhej të ishin informuar, konsultuar dhe përfshirë në diskutimet për të gjithë legjislacionin e Bashkimit Europian që do të duhet të zbatojnë.
Si do t’i prekë ky legjislacion?
A janë gati që të rrisin investimet?
A janë gati që të adoptojnë teknologjinë?
A kanë punonjës të kualifikuar për të përballuar këtë proces?
I njëjti diskutim vlen edhe për boshllëqet ekonomike dhe sociale në vend. Nga pagat, tek pensionet, tek çështjet sociale, fatkeqësisht Shqipëria vazhdon të mbetet ndër vendet e fundit në rajon.
Për këtë arsye, kur themi se procesi i integrimit duhet të jetë prioritet kombëtar, pikërisht këtë kemi parasysh: përgatitjen reale të shoqërisë shqiptare për Bashkimin Europian.
Sepse integrimi nuk është thjesht miratim ligjesh në letër. Integrimi është ndërtim standardesh, institucionesh dhe një ekonomie funksionale në praktikë.
