Një rrugë me kalldrëm, e ndërtuar rreth 7,000 vjet më parë, është zbuluar nën ujërat e Detit Adriatik pran&e...
POLITIKE
Rama dhe mandati i katërt: Një Merkel Evropian apo një Erdogan Ballkanik?
Dosja.alPërditësimi i fundit 5 Shkurt 2025, 13:45
TIRANË- Gjithnjë e më afër 11 majit, Edi Rama nuk e fsheh më kënaqësinë për të drejtuar edhe për 4 vite të tjera qeverinë. Kundërshtimeve të mediave iu ka shpëtuar duke i injoruar dhe fyer gazetarët, kritikave të opozitës iu shmanget duke i quajtur “non-grata”, e të vetmit që i ngelen përballë janë mijëra shqiptarë të cilët e pyesin se me çfarë guximi kërkon një mandat të katërt për të qeverisur kur gjysmën e kabinetit të tij e ka ose në burg ose në kërkim.
Por për këtë ka menduar propaganda qeveritare. Edhe njëherë, nuk zhgënjen. Kryeministri është kapur në një argument i cili me shpejtësi po nis të shpërndahet në të gjitha mediat e kontrolluar prej tij dhe tek të gjithë analistët që dalin në panele televizive. Mandati i katërt nuk është një herezi, as një çmenduri, por një histori e provuar nga liderë të tjerë të sukseshëm europianë. Jo pa qëllim, Rama këtë argument e shpjegon edhe vetë më mirë. Ai tregon sesi gjermanët i besuan Angela Merkel 4 mandate, apo sesi holandezët i dhanë besimin Mark Routte.
Në fakt, referenca është e saktë. Ajo që thotë kryeministri ka ndodhur. Por a mund të jetë një gjysmë e vërtetë më e fortë se e vërteta? Gjasat janë që jo, por për aq kohë sa gjysmë të vërtetat shpërndahen me shpejtësinë e erës, kryeministri vazhdon të pikturojë i qetë mandatin e katërt. Kështu jo pa qëllim, Rama sjell dy shembuj qeverisjeje të gjatë në Evropë. Në fakt, ne duhet ta ndihmojmë në këtë argument të ri propagandistik duke i shtuar disa doza realiteti. E vërteta të bën mirë!
Miku i tij i çmuar, Presidenti turk Rexhep Tayip Erdogan për 21 vite po udhëheq Turqinë. Ai u bë fillimisht kryeministër në vitin 2003 dhe në vitin 2014 u bë president, post që e mban deri më sot. Është e vështirë për ta kuptuar përse Rama nuk merr shembull mikun dhe vëllain e tij, Erdogan por detyrohet të përdorë emrin e Merkel.
A nuk është Erdogan shembulli që iu duhet paraqitur shqiptarëve?
Në fakt kleçka është pak më e thellë se kaq. Sigurisht që Rama e ka parasysh Erdogan kur shtron për të bërë të zakonshëm mandatin e katërt. Ai e di fare mirë se Erdogan ka ndryshuar sistemin politik të Turqisë, nga një demokraci parlamentare në sistem presidencial të centralizuar për të marrë sa më shumë fuqi në duart e tij. Rama e di mirë, se Erdogan ndaloi dhe persekutoi një sërë kundërshtarësh të tij politikë, kufizoi fuqitë e parlamentit dhe kontrollon tërësisht gjyqësorin.
Rama po ashtu e di se Erdogan në dallim nga Merkel apo Routte ka shtypur median, ka arrestuar gazetarë, ka censuruar rrjetet sociale, është I zhytur në një sërë skandalesh korruptive, ndërsea ekonomia turke nën drejtimin e tij është përballur me inflacion të lartë dhe rënie të vlerës së lirës turke.
Me kë ngjan më shumë pushteti i Edi Ramës që sot kërkon një mandat të katërt? A është më pranë Merkel dhe Rutte? Apo është një tentativë gjithnjë e më e ngjashme si Erdogan?
Për ta shfaqur veten si një lider perëndimor, sot Ramës i vjen turp nga vëllai i tij politik. Se ai sot nuk mund tju thotë shqiptarëve se “edhe turqit nuk ishin budallenj dhe i dhanë Erdogan 21 vite pushtet”, se në rast se pranon këtë, atëherë ai pranon njëherë e mirë modelin që ka ndjekur në 12 vitet e tij të pushtetit, timonit e tepsisë./Dosja.al
