Një aksident rrugor është regjistruar mëngjesin e së shtunës në aksin Levan-Vlorë, ku një automjet tip Fiat ë...
POLITIKE
Reuters: Parlamenti shqiptar përfshihet nga tensionet për akuzat e korrupsionit ndaj Belinda Ballukut
PiranjatPërditësimi i fundit 18 Dhjetor 2025, 20:02
Agjencia ndërkombëtare e lajmeve Reuters ka pasqyruar sot situatën e krijuar në Parlamentin shqiptar, përplasjet dhe tensionet e opozitës të shkaktuara nga akuzat për korrupsion ndaj zëvendëskryeministres Belinda Balluku. Pasqyrimi i kësaj çështje, ka vendosur zhvillimin në fokusin e vëmendjes ndërkombëtare.
Artikulli i plotë i Reuters:
Parlamenti shqiptar u përfshi nga tensione të forta të enjten, pas përplasjesh mes deputetëve të opozitës dhe gardës brenda sallës plenare, pas javësh tensionesh lidhur me akuzat për korrupsion ndaj zëvendëskryeministres dhe zyrtarëve të tjerë. Deputetët ndezën flakadanë, hodhën ujë drejt kryetarit të Kuvendit dhe zunë vendet e rezervuara për ministrat e qeverisë, në përpjekje për të bllokuar zhvillimin e seancës, përpara se të ndërhynte Garda.
“Nuk mund të ketë parlament me ata që vjedhin dhe arratisen”, deklaroi Sali Berisha, kryetar i opozitës dhe i Partisë Demokratike. “Ligji dhe vetëm ligji duhet të mbizotërojë.”
Deputetët e opozitës kërkonin të njiheshin me akuzat zyrtare të paraqitura ndaj zëvendëskryeministres Belinda Balluku.
Prokuroria e Posaçme, e ngarkuar me luftën kundër korrupsionit dhe krimit të organizuar, i ka kërkuar Kuvendit të lejojë arrestimin e Ballukut, ndërsa legjislativi, ku partia në pushtet e drejtuar nga Rama ka shumicën, pritet të votojë për këtë kërkesë të premten. Balluku, e cila ka shërbyer edhe si ministre e Infrastrukturës dhe Energjisë dhe konsiderohet aleatja më e afërt e Ramës në kabinet, akuzohet se ka marrë pjesë në praktika korruptive për të favorizuar kompani të përfshira në projekte të mëdha infrastrukturore, përfshirë një tunel dhe Unazën në Tiranë.
Ajo i ka cilësuar akuzat në parlament muajin e kaluar si “baltosje, insinuata, gjysmë të vërteta dhe gënjeshtra”, duke deklaruar se do të bashkëpunojë plotësisht me drejtësinë.
