Sa mandate ju kanë hequr? Berisha për partitë e reja: Rezultati i tyre është baras me Tom Doshin

TIRANË- Kreu i Partisë Demokratike, Sali Berisha, duke komentuar zgjedhjet e 11 majit u pyet për Aleancën për Shqipërinë Madhështore. I ftuar në emisionin "Opinion", Berisha tha se mandatet i mori mbi bazën e rakordeve të mëpasrshme elektorale. Një pikë tjetër ku u ndal ishin partitë e reja, “Mundësia” e Agron Shehajt dhe “Shqipëria Bëhet” e Adriatik Lapajt. Berisha thotë se bëri përpjekje për t’i bashkuar në koalicion dhe nuk arriti t’i bindte.

Pjesë nga biseda në studio: 

Blendi Fevziu: Koalicioni çfarë ju solli? Përveç riciklimit të një numri kryetarësh partie që kanë 30 vjet që rrinë po aty, as kanë parti fare njëherë, vetëm negociojnë në vendin e tyre, çfarë ju solli? Ju mori 10 mandate nga 50 që keni gjithsej dhe nuk solli as vota.

Sali Berisha: A mund të jap një përgjigje këtu? Ato mandate i mori mbi bazën e rakordeve elektorale.

Blendi Fevziu: Të dikurshme?

Sali Berisha: Të mëparshme, për shembull po marrim cilën të duash ti mbi bazën e rakordeve elektorale të viteve të fundit dhe unë them një gjë, kriter tjetër për të bërë koalicionin përveçse t’u diktosh pse shkon, pse s’vjen, nuk ka. Ti merr Partinë e Lirisë, kishte 118  mijë vota dhe mori 4 vende.

Blendi Fevziu: Sa ç’kishte.

Sali Berisha: Por kishte një bindje deputeti që i binden deputetit 25 mijë vota.

Blendi Fevziu: Sot Adriatik Lapajt i ka rënë deputeti 67 mijë vota.

Sali Berisha: Ky është gabimi i tij se në qoftë se do të ishte në koalicion Adriatik Lapaj siç u ofrua dhe në qoftë se Agron Shehaj vinte…

Blendi Fevziu: Duhej të ishte, por a bëtë ju përpjekje për t’i marrë këta të dy në koalicion?

Sali Berisha: Bëra përpjekjet e mia.

Blendi Fevziu: Se ata pretendojnë që jo.

Sali Berisha: Nuk është e vërtetë. Edhe haptazi, edhe direkt.

Blendi Fevziu: Shehaj ka thënë që nuk shkoja për çështje parimi, por Lapaj nuk bindej. A e dini ju sa mandate ju kanë hequr?

Sali Berisha: Cili ishte rezultati i tyre? Rezultati i tyre është baras me Tom Doshin. Njeriu duhet të jetë… në qoftë se ka qëllim interesin publik, duhet t’i përmbahet. Ata i hoqën opozitës 5-6 deputetë.

Blendi Fevziu: Ju e dinit që do t’ju hiqnin deputetë. Kjo ishte matematika më e thjeshtë e mundshme.

Sali Berisha: Por ata s’erdhën, nuk pranuan.

Blendi Fevziu: Por edhe ky është dështim i Partisë Demokratike, duhet t’i bindnit.

Sali Berisha: Ata  nuk janë fëmijë që t’i bindë Partia Demokratike. Agron Shehaj iku nga Partia Demokratike, kurse ai kishte rrugën e vet.