Një kallëzim i ri penal i shtohet çështjes së abuzimit me fondet e filialit të Postës Shqiptare në Durrës.
Sipas...
POLITIKE
Zgjedhjet e 11 majit/ KQZ krijon zyrë të posaçme për të kontrolluar partitë dhe kandidatët për deputet gjatë fushatës elektorale, rastet do t'i kalojnë SPAK-ut
n.fPërditësimi i fundit 1 Prill 2025, 21:01
TIRANË- Komisioni Qendror i Zgjedhjeve, KQZ ka ngritur një zyrë të posaçme për të kontrolluar partitë dhe kandidatët për deputet gjatë fushatës elektorale për zgjedhjet e 11 majit. Mësohet se fokus i kësaj zyre do të jetë fushata online.
Bëhet me dije se zyra do të ketë 4 punonjës, ku njëri do të kontrollojë raportet e monitorimit të përditshëm në kohë reale dhe 3 të tjerë, do të fokusohen tek fushata digjitale. Ata do të kontrollojnë postimet online për të parë nëse do të ketë shkelje të rregullave të Kodit Zgjedhor, përfshirë zhvillimin e aktiviteteve që KQZ i ka ndaluar.
"Objekti i këtij vendimi përcakton: monitorimin e fushatës zgjedhore online; periudhën e monitorimit të fushatës; detyrat dhe përgjegjësitë e Strukturës së Posaçme; mënyrën e verifikimit. Periudha e monitorimit të Strukturës së Posaçme fillon jo më parë se 30 (tridhjetë) ditë para datës së zgjedhjeve dhe përfundon jo me vonë se 60 (gjashtëdhjetë) ditë nga data e zgjedhjeve," thuhet në dokumentin e KQZ.
Hetuesit e KQZ do të mbajnë shënim shpenzimet në rrjetet sociale, ku partitë apo kandidatët paguajnë për më shumë shikueshmëri. Ata do të grumbullojnë informacion edhe kur reklamat politike nuk kryhen drejtpërdrejt nga partitë, por edhe nga palë të treta, të cilët i shmangen ligjit.
Do të kontrollohet nëse administrata përdor vendet e punës për video në favor të kandidatëve ose nëse partitë a kandidatët përdorin burimet shtetërore. Po ashtu, do të monitorohen edhe profilet e politikanëve në rrjetet sociale, nëse funksionarët deklarohen psh, si ministra, e nga ana tjetër postojnë mesazhe elektorale.
Raportet e përditshme dhe informacionet në kohë reale, kjo strukturë e posaçme, do t’ia kalojë personave të kontaktit nga SPAK dhe Prokuroria e Përgjithshme, të cilët ditët e ardhshme do të vendosen në një zyrë të përbashkët në KQZ.
Detyrat dhe përgjegjësitë e Strukturës së Posaçme:
-Mbikëqyrja e shpenzimeve financiare të evidentuara nga vetë platforma sociale si dhe monitorimin e veprimtarive të ndaluara.
Në lidhje me mbikëqyrjen e financimit të fushatës zgjedhore do të monitorohen: Aktivitetet e zhvilluara nga subjektet zgjedhore në rrjetet sociale;
-Reklamat politike në rrjetet sociale të subjekteve zgjedhore, kandidatëve si dhe; Identifikimi i palëve të treta në rastet kur është e mundur.
Në lidhje me veprimtaritë e ndaluara gjatë fushatës zgjedhore, do të monitorohen:
- Regjistrimi i videove, spoteve apo pamjeve në vendin e punës për qëllime zgjedhore për mbështetjen e një kandidati nga ana e një funksionari publik;
-Përdorimi i institucioneve publike për qëllime zgjedhore;
- Keqpërdorimi i profileve zyrtare të institucioneve publike në rrjetet sociale.
-Do të identifikohet narrativa në lidhje me fakte të pavërteta ndaj procesit zgjedhor në mënyrë që të orientohen fushatat informuese dhe edukuese të KQZ-së.
-Periudha e monitorimit të Strukturës së Posaçme fillon jo më parë se 30 (tridhjetë) ditë para datës së zgjedhjeve dhe përfundon jo me vonë se 60 (gjashtëdhjetë) ditë nga data e zgjedhjeve.
-Personat e caktuar do t'i nënshtrohen trajnimit nga Drejtoria e Subjekteve Zgjedhore dhe Mbikëqyrjes, Financimit dhe Monitorimit të Fushatës pranë Komisionit Qendror të Zgjedhjeve para fillimit të periudhës së monitorimit.
