Kryetari i PD-së, Sali Berisha i bëri thirrje maxhorancës të anulojë një anti-miting të paralajmëruar për ta mbaj...
SOCIALE
“Pallati me shigjeta” më keq se Kabuli, banorët: UKT na sjell ujë vetëm 1 orë në ditë
PiranjatPërditësimi i fundit 2 Tetor 2025, 16:09
“Tmerr, sikur jemi në Kabul, pa ujë. Vjen njëherë në ditë.” Ky banor i zonës së pallatit me Shigjeta nuk e di që uji në Kabul vjen disa herë në ditë. Ai, si shumë të tjerë në Tiranë, po e shohin gjithnjë e më pak ujin në rubinetat e tyre.
Për herë të fundit, uji në rubinetin e kësaj banese pranë unazës së re në Tiranë ka ardhur pasditen e djeshme. Kjo situatë vazhdon prej një muaji në këtë zonë, ku banorët furnizohen me ujë vetëm një herë në ditë, jo më shumë se një orë. Banorët thonë se sipas Ndërmarrjes së Ujësjellës-Kanalizimeve në Tiranë, janë bërë ndërhyrje në rrjetin e furnizimit.
“Në datën 4 shtator, ujësjellësi ka ardhur dhe ka prerë linjën që furnizonte lagjen dhe ka lënë linjën e re që është bërë në 2014, por ajo nuk funksionon”
Rreth 100 shtëpi në këtë zonë vuajnë mungesën e ujit të pijshëm dhe në shumë raste janë detyruar ta blejnë tek operatorët privatë që e tregtojnë ujin me autobote, një tregti kjo që po lulëzon gjithnjë e më shumë, duke shtuar dyshimet e banorëve se ndërprerjet e ujit nga UKT bëhen pikërisht për të stimuluar këtë biznes.
“Nga data 4 deri në 10 shtator, banorët janë furnizuar me botë, kanë blerë botën, 10 mijë lekë të vjetra. Botët vijnë nga kompanitë private.”
“Depozita nuk diskutohet, dy tonëshe. Nja dy herë kemi blerë. Këtë të dielë që kaloi nuk erdhi fare. Ujësjellësi ka probleme.”
Sipas banorëve, edhe në atë orar të kufizuar kur vjen, uji nuk ka presion dhe janë detyruar të përdorin pompa, duke sjellë kosto shtesë me energjinë elektrike.
“Çdo familje duhet të ketë pompë thithëse që ta thithë nga linja, sepse nuk arrin uji të vijë në rubinet.”
Si në shumë zona të Tiranës, edhe këta banorë kërkojnë të kenë të paktën një orar fiks kur UKT i furnizon me ujë.
“Nuk ka ndonjë orar fiks, se po rrimë njëherë në 15:30, njëherë në 16:00.”
“Ne duhet të rrimë të gjithë gati për të ndezur pompën, se ngelem pa ujë. Kemi pompë për ngritje dhe pompë për thithje. Të paktën 30 mijë lekë të vjetra në muaj na duhen vetëm për energjinë elektrike.”
“Na ka bërë zbor, tako pompën thithëse, stako, po vjen tani, po vjen pastaj. Në mes të Tiranës në 2025 mos kesh ujë. Nuk vjen uji po nuk takove pompën se s’ka presion", shprehen ata për klan.
Banorët ankohen çdo ditë në UKT, por shqetësimet e tyre vijojnë të bien në vesh të shurdhër. Zonat periferike, jashtë unazës së madhe të Tiranës, janë ato që vuajnë më shumë mungesën e gjatë të ujit të pijshëm. Edhe në qytet, situata sa vjen e përkeqësohet, pasi banorët po marrin nga 1 deri në 3 orë ujë në ditë.
