Gazetarja e njohur e Vlorës, Afrovita Hysaj ka treguar momentet e fundit të kolegut dhe mikut Enrik Mehmeti drejt Zvërnecit, mbrëmjen e t&...
SOCIALE
Të dhënat: Numri i degëve të bankave u rrit më tej në tremujorin e parë të vitit
M.B.Përditësimi i fundit 26 Maj 2025, 07:36
TIRANA- Numri i degëve të sektorit bankar vazhdoi rritjen edhe në tremujorin e parë të këtij viti. Sipas të dhënave nga Shoqata Shqiptare e Bankave, në fund të muajit mars bankat tregtare raportuan gjithsej 408 degë, nga 405 në fund të vitit 2024 dhe 389 që patën raportuar në të njëjtën periudhë të një viti më parë.
Kontributin kryesor në rritjen e numrit të degëve krahasuar me një vit më parë e kanë dhënë Banka e Bashkuar e Shqipërisë (UBA), me 11 degë të reja, ProCredit Bank me pesë degë. Banka Amerikane e Investimeve (ABI Bank) me tre degë. Mes bankave të tjera, BKT dhe Intesa Sanpaolo kanë reduktuar numrin e degëve me nga një njësi secila, por nga ana tjetër kjo është kompensuar nga shtimi i një dege të re nga Credins Bank dhe Tirana Bank.
Bankat me praninë më të gjerë gjeografike ngelen Raiffeisen Bank, me 74 degë, e ndjekur nga BKT me 62 degë dhe Credins Bank, me 52 degë. Paralelisht, edhe numri i punonjësve të sektorit bankar u rrit më tej 7227 punonjës, 3.8% më shumë krahasuar me një vit më parë.
Në vitet e fundit, disa prej bankave të sektorit kanë nisur një cikël të zgjerimit të degëve, të lidhur me strategjitë e tyre të rritjes, veçanërisht në segmentin retail. Pas marrjes së kontrollit nga grupi i sigurimeve Eurosig, banka më e vogël e sistemit, UBA, nisi një strategji të zgjerimit të shpejtë të rrjetit, me qëllim për të rritur pjesën e saj në treg.
Ndërkohë, ABI Bank, që në përgjithësi ka qenë e orientuar kryesisht në segmentin e biznesit, po tenton të rritet edhe në produktet retail, me interes të veçantë sidomos te depozitat. Degët dhe punonjësit e bankave po shtohen, pavarësisht tendencës së dixhitalizimit në rritje të produkteve dhe shërbimeve bankare.
Rritja e numrit të degëve është e lidhur me momentin pozitiv të sektorit bankar në periudhën pas pandemisë. Performanca e mirë financiare ka nxitur banka të veçanta të investojnë edhe në zgjerimin e rrjetit të degëve.
Sipas të dhënave paraprake të publikuara nga Shoqata Shqiptare e Bankave, fitimi i përbashkët i bankave tregtare me Standardet Ndërkombëtare të Raportimit Financiar (IFRS) vitin e kaluar arriti në 36.2 miliardë lekë, më i larti i regjistruar ndonjëherë. Fitimi i sistemit është rritur me 27% krahasuar me vitin 2023.
Numri i degëve dhe agjencive bankare në Shqipëri e ka shënuar nivelin më të lartë në vitin 2012, me 556 degë dhe agjenci. Nga ai moment, numri i njësive bankare të shërbimit nisi të pakësohet, edhe për faktin e thjeshtë se sektori bankar nuk ishte më në fazë ekspansioni. Efektet e krizës dhe nevoja për një kontroll më rigoroz të shpenzimeve bëri që shumica e bankave të frenonin zgjerimin e rrjetit dhe të mbyllnin një pjesë të degëve ekzistuese.
Procesi u theksua më shumë pas vitit 2015, nga procesi i konsolidimit të sektorit bankar dhe ulja e numrit të bankave tregtare. Numri i bankave tregtare ra nga 16 në 11 dhe si rezultat i bashkimeve mes bankave ekzistuese një pjesë e mirë e degëve të bankave të përthithura u mbyllën./ Monitor
