Ka qenë ministrja për Shtetin dhe Parlamentin, Erjona Ismaili, ajo që ka reaguar pas mbledhjes së qeverisë lidhur me akuzat e pretend...
SPORT
“Vallja” e fundit në merkato, Juventusi më afër Levandovskit se Milani
PiranjatPërditësimi i fundit 23 Prill 2026, 13:06
Robert Levandovski është kthyer në një nga objektivat kryesorë të Juventusit për të përforcuar repartin ofensiv. Bomberi polak vazhdon të jetë në qendër të vëmendjes në Kontinasa, ku synohet një sulmues që garanton të paktën 20 gola në sezon, për të ngritur nivelin e skuadrës së drejtuar nga Luçiano Spaleti.
Spaleti kishte kërkuar një sulmues që në merkaton e dimrit, por pista si Randal Kolo Muani, Mauro Ilardi dhe Jousef En-Nesiri nuk u konkretizuan. Tani gjithçka është shtyrë për verën, kur pritet të vijë të paktën një sulmues i ri, sidomos nëse largohet Dushan Vlahoviç. Kontrata e Levandovskit me Barcelonën është në një pikë të paqartë, rinovimi nuk po avancon, pasi klubi i drejtuar nga Joan Laporta nuk duket i gatshëm të përmirësojë ofertën (madje me pagë të reduktuar). Kjo situatë ka bërë që agjenti i tij, Pini Zahavi, të kërkojë alternativa.
Interes për sulmuesin nuk mungon. Nga Arabia vijnë oferta të majme, por Levandovski i ka refuzuar më parë. Në garë janë edhe ÇiKago Fire, që ofrojnë kontratë deri në vitin 2028 me 20 milionë euro në sezon. Megjithatë, prioriteti i polakut mbetet Europa dhe një klub i madh. Për këtë arsye, Juventusi shpreson ta bindë me projektin sportiv, duke i ofruar një kontratë rreth 6 milionë euro në vit plus bonuse.
Edhe Milani është në garë për Levandovskin, por brenda klubit ka më pak bindje krahasuar me Juventusin. Kjo i jep bardhezinjve një avantazh në Itali, edhe pse në garë mbeten edhe klube të pasura turke. Për Juven, polaku do të ishte një zgjidhje e menjëhershme, edhe pse jo afatgjatë, për shkak të moshës. Por për një klub që nuk lufton për titull prej vitesh, prioriteti është i qartë: të rikthehet te fitoret.
Levandovski mbetet një garanci absolute, edhe këtë sezon me Barcelonën është pranë 20 golave në total (mes La Liga, Champions dhe Superkupës). Megjithatë, Juventusi po monitoron edhe alternativa të tjera: Randal Kolo Muani (në rikthim te PSG pas huazimit); Xhoshua Zirkzee (mund të largohet nga Mançester Junajtid); Darvin Nunjez (dëshiron rikthimin në Europë, por paga prej 23 milionë eurosh është shumë e lartë). Juventusi po përpiqet të bindë Levandovskin për një “last dance” në Torino. Një operacion i vështirë, por jo i pamundur, sidomos nëse projekti sportiv rezulton më bindës se milionat nga jashtë Europës.
