Një aksident i rëndë ka ndodhur sot (4 qershor), në aksin Krutje-“Pushimi i shoferit”, në rrugën Lushnjë-Fier.
...
SOCIALE
Dhunë ndaj gazetarit dhe sanitareve, nënshtrim ndaj të pushtetshmit
PiranjatPërditësimi i fundit 13 Shtator 2025, 21:22
Në Shqipëri tashmë prej dekadash është instaluar një model i biznesmenit që sillet si gangster, i cili duke qenë i afërt me pushtetin sillet në mënyrë arrogante madje edhe të dhunshme ndaj kujtdo, përfshirë gazetarët. Pa llogaritur këtu nëpunësit e tij të cilët i trajton në rastin më të mirë si të papërfillshëm dhe në rastin më të keq si skllevër të shfrytëzueshëm.
Ky ishte rasti më i fundit që përfshiu Refik Halilin dhe Sinan Idrizin, aksionerin kryesor të kompanisë Air Albania. Ky i fundit u përball me mikrofonin e Piranjas Edon Kuqi i cili e pyeti mbi largimin nga puna të dy sanitareve të kompanisë, të cilave nuk u ishin paguar as sigurimet shoqërore. Kaq mjaftoi që drejt gazetarit të suleshin sejmenët e biznesmenëve të cilët nuk i kursyen as kërcënimet mafioze “të marr peng, të fus në bagazh”.
Është koha që njerëz të tillë, mesa duket të pamësuar me normat bazike shoqërore dhe faktin që jetojnë në një shoqëri demokratike të kuptojnë se është normale për një gazetar të ketë lirinë të shtrojë pyetje, ashtu si ata kanë lirinë të kthejnë përgjigjen. Kjo duhet të ndodhë në një mjedis dhe klimë normale, pa patur frikën se cënohet egoja e biznesmenit-gangster dhe pa ndërzim të badigardëve në sulm.
Fatkeqësisht ky problem është strukturor dhe piramidal: të njëjtët njerëz që ushtrojnë sjellje brutale ndaj atyre që i perceptojnë si më të dobët, sillen në mënyrë servile dhe puthadore ndaj atij që është më i pushtetshëm. Atij të cilit i paguajnë avionin privat për çdo trill personal.
Ky incident kurrsesi nuk do të ndalojë Piranjat dhe gazetarët të ushtrojnë profesionin e tyre, duke bërë pyetje të thjeshta që për biznesmenët-gangsterë rezultojnë të vështira për të marrë përgjigje.
Ama për shoqërinë shqiptare, e cila pretendon se po përgatitet të futet në familjen e vlerave europiane, ky moment duhet të shërbejë për reflektimin dhe braktisjen përfundimtare të këtij modeli, si një atavizëm problematik i së shkuarës./piranjat.al
