Ka nisur protesta e pestë në mbrojtje të Zvërnecit, ku qytetarët kundërshtojnë projektin për ndërtimin e një r...
AKTUALITET
Dëmtimi i argjinaturës së Mjedës, Komiteti i Digave: Rrezikohen 5500 banorë, MBZHR ndërhyrje emergjente
PiranjatPërditësimi i fundit 21 Qershor 2023, 08:00
Ministrisë së Bujqësisë dhe Zhvillimit Rural i është kërkuar ndërhyrje emergjente për rehabilitimin e argjinaturës së Mjedës e cila ka pësuar dëmtime. Mbledhja e fundit e Komitetit Kombëtar të Digave të Mëdha e ka cilësuar këtë si një çështje me rëndësi të veçantë teksa ka bërë një parashtrim mbi konstatimin si dhe rrezikun që u kanoset 5500 banorëve nëse nuk merren masa.
Vendimi i datës 25 maj 2023 “Për zgjidhjen e problematikave të konstatuara në kompleksin e strukturave hidraulike të HEC- Ashtës dhe Argjinatura e Mjedës” nënvizon se në mbështetje të Ligjt Nr. 8681, date 02.11.2000 “Për Projektimin, Ndërtimin, Shfrytëzimin dhe Mirëmbajtën e Digave dhe Dambave”, VKM Nr. 147, date 18.03.2004 “Miratimin e Rregullores për Sigurinë e Digave dhe të Dambave”, Komiteti Kombëtar i Digave të Mëdha (KKDM) në mbledhjen e datës 25.05.2023 mori në shqyrtim problematikat e konstatuara në strukturat hidraulike të HEC Ashtës dhe argjinaturës së Mjedës dhe të dhëna në Raportin vjetor për vitin 2022 të kompanisë ENERGJI ASHTA shpk.
Bazuar tek ky Raport, rezulton se pjesa e poshtme e argjinaturës së Mjedës është e dëmtuar në disa pjesë të saj duke rrezikuar afro 5 500 banorë në zonën urbane të Mjedës që ndodhet poshtë kësaj argjnature.
“Gjithashtu shumë pjesë të betonit në pjesën e poshtme të shkarkuesit të Spatharës janë të dëmtuar. Duke patur parasysh faktin se këto struktura janë objekte ndërtimore nivelngritëse dhe ujëmbledhës formues si dhe prishja e mundshme e tyre përben rrezik për banorët e zonës urbane të Mjedës, i githë ky kompleks duhet të trajtohet si objekt i rëndësisë së veçantë” thuhet në vendim.
Komiteti Kombëtar i Digave të Mëdha pas diskutimeve ka vendosur që lidhur me këtë problematikë të merren masa urgjente.
Kështu në pikën e parë të vendimit Komiteti i ka kërkuar Ministrisë së Bujqësisë dhe Zhvillimit Rural (MBZHR) të marrë masa emergiente për rehabilitimin e argjinaturës së Mjedës në bazë të një studimi të gjendjes aktuale, analizë të hollësishme tekniko-ekonomike dhe hartimit të një projekti zbatimi të hartuar nga ekspertë të licencuar për projektimin e digave të mëdha.
Ky projekt duhet të dorëzohet për tu shqyrtuar dhe miratuar në KKDM përpara fillimit të sezonit të reshjeve.
Në pikën dy vendimi thotë se kompleksi i strukturave hidraulike të HEC Ashtës duke përfshirë strukturën hidraulike të Spatharës dhe argjinaturën e Mjedës të trajtohen si objekte të rëndësisë së veçantë në përputhje me kërkesat e legjislacionit të mësipërm.
“Për rrjedhojë shfrytëzuesit e këtyre strukturave duhet ti mirëmbajnë dhe monitorojnë të gjithë elementet e këtij kompleksi dhe të informojnë KKDM të paktën dy herë në vit për gjendjen e strukturave, masat e monitorimit dhe të sigurisë që janë marrë si dhe të hartojnë planet e gatishmërisë në rastet e emergjencave civile për shkak të prishjes së mundshme të ndonjë prej këtyre elementeve. Këto plane dhe harta të përmbytjeve duhet të dorëzohen pranë KKDM / SKDM brenda fillimit të sezonit të reshjeve” thuhet në vendim. /Monitor
