Dashi
Do merrni fryme lirisht gjate gjithë kësaj dite dhe gjerat kane për te ecur për mrekulli mes jush dhe atij qe keni ne krah. B...
AKTUALITET
Drejtori i burgjeve: Politikanët refuzojnë ushqimin në qeli, ja arsyeja
PiranjatPërditësimi i fundit 17 Nëntor 2025, 13:11
Kreu i burgjeve, Klevis Qose është duke raportuar për veprimtarinë e institucionit që drejton dhe projektbuxhetin e vitit 2026, përpara deputetëve në Komisionin për Çështjet e Brendshme dhe të Mbrojtjes.
Qose është pyetur nga deputeti i Partisë Mundësia, Erald Kapri për kushtet e qelive, duke parashtruar se në dijeninë e tij politikanët që qëndrojnë në burgun e Durrësit kanë marrë ustallarë e i kanë shndërruar dhomat si hotele.
"Kam informacion që në burgun e Durrësit ku janë VIP-at e politikës që vuajnë dënimin ka pasur ndërhyrje nga jashtë për rritje komoditeti në qelitë e tyre, janë futur ustallarë, marangozë, kuzhinierë po të doni, krevate më të mire. Kanë ndërhyrë për ta bërë si dhomë hoteli", ka thënë ai.
Ndërkohë, kreu i Përgjithshëm i Burgjeve ka thënë se çdo gjë është brenda standardeve dhe nuk ka ekzagjerime të tilla.
"Më përmendët komoditetin, Drejtoria e Përgjithshme për zyrtarët që nuk kanë kryer vepra të rënda penale ka akomoduar në IEVP Durrës dhe IEPV Fier pjesë më të madhe të zyrtarëve të cilët s’kanë vepra të rënda.
Nuk mund të them që ka komoditete të mobilieve, televizor janë brenda standardeve, krevatet, dyshekët dhe pjesën tjetër të akomoduese e mbulon Drejtoria e Përgjithshme e Burgjeve, nuk kemi tek këto kategori që thoni", ka thënë Klevis Qose.
Sakaq, deputeti Erald Kapri ka shtruar dhe një problematikë tjetër. "Dhe pyetja tjetër, ju harxhoni shumë para për ushqime më burgje. Mbi 90% i marrin nga familjarët?", ka thënë ai.
Drejtori i Përgjithshëm i Burgjeve ka garantuar se ata zbatojnë vetëm ligjin, duke garantuar 3 vakte ushqim në ditë për çdo të dënuar dhe të paraburgosur, pavarësisht se 20% zgjedhin ushqim nga jashtë sepse i tremben konflikteve që kanë dhe nuk hanë ato që gatuhen nga kuzhina e burgut.
"Sa i përket ushqimit të familjarëve, nuk është që vërtetë 90% e tyre marrin ushqim nga familjarët. Sistemi i burgjeve ka detyrim ligjor që për çdo të dënuar dhe paraburgosur të garantojë ushqim 3 vakte, ju keni bazë ligjore që ti thoni atij tjetrit ha me zor. Ne kemi detyrim që çdo të dënuar ti vendosim racionet sipas kuotave.
Mund të ketë refuzim tek 20% por nuk vjen për shkak të ushqimit, por një trendi për shkak të konflikte të jashtme që kanë si hakmarrjeve, gjakmarrjes apo problematikeve nëpërmjet grupeve kriminale. Por është lejuar që një familjar të çojë supën nga dora e nënës, vajzës, gruas apo një familjari për të dënuar, është para në kuadrin e rehabilitimit", ka përmbyllur Klevis Qose.
